Saqtandyrý naryǵynda DSU-nyń sheteldik kompaniialardyń filialdaryn engizý týraly talaby júzege asatyn boldy. Bul týraly búgin Almatyda ótip jatqan qarjygerlerdiń VIII Kongresinde QR Ulttyq bankiniń basshysy Daniiar Aqyshev aitty, dep habarlaidy QazAqparat tilshisi.
«Osy oraida ulttyq saqtandyrý naryǵynda turaqty damý modelin jasaqtaýǵa ýaqyt az qaldy. Olarǵa sheteldik kompaniialarmen básekelesýge týra keledi», - dedi ol.
Daniiar Aqyshev 5 jylda eki ese artqanyna qaramastan qazaqstandyq saqtandyrý naryǵy áli de táýekelderdi sińiretin joǵary kapitaldy quralǵa ainala almai jatqanyn aitty.
«Saqtandyrý naryǵynyń el ekonomikasyndaǵy mańyzy áli de mardymsyz. Sońǵy 10 jylda saqtandyrý syiaqylary JIÓ 1 paiyzynan asqan joq. Bizdiń kórsetkishimiz tek damyǵan elder ǵana emes, TMD kóleminde de tómen bolyp tur», - dedi bas bankir.
Onyń aitýynsha, 2018 jyly Ulttyq bank saqtandyrý naryǵy týraly zańnamany jetildirdi. Sonyń arqasynda onlain-saqtandyrý, tutynýshylardyń quqyǵyn qorǵaý, shetelge shyǵatyn týristerdiń quqyǵyn qorǵaý kestesi ózgertildi.
Endigi kezekte jańa talaptarǵa sáikes saqtandyrý uiymdarynyń aktsionerleri men menedjmentine naryqta ádil áreket etý úshin kúsh biriktirýge týra keledi.
