Qazaqstandyq boksshy Sáken Bibosynov álem chempiony atandy, - dep habarlaidy "Ult aqparat".
Serbiia astanasy Belgrad qalasynda ótip jatqan bokstan álem chempionaty óz máresine jetýge taiaý.
51 kelige deiingi salmaq dárejesinde judyryqtasqan otandasymyz Sáken álem chempionatynyń altyn medalin amerikalyq Rosko Hillmen sarapqa saldy. Qazaqstandyq boksshy qarsylasyn 5:0 esebimen jeńip, altyn júldege ie boldy.
Aita keteiik, Bibosynov jartylai finalda tailandtyq Thanarat Saengpfetti jeńgen. Al onyń aldynda ózbekstandyq Hasanboi Dýsmatovtan, úndistandyq Dipaktan, kolýmbiialyq Rivas Martinesten basym túsken.
Bul - Qazaqstan quramasynyń Belgradtaǵy álem chempionatynda alǵan ekinshi altyny. Buǵan deiin Temirtas Júsipov álem chempiony atanǵan edi. Odan bólek Mahmýd Sabyrhan - kúmis, Abylaihan Júsipov qola medal enshilegen bolatyn.
