Májilstiń jalpy otyrysynda depýtat Erlan Sairov ministrlerdi shekaralyq aýyldarǵa birge barýǵa shaqyrdy, dep habarlaidy QazAqparat.
«Biz aimaqtarǵa, shalǵai selo, shekara túbindegi aýyldarǵa jii baramyz. Shyny kerek, búgin sol jaqtaǵy azamattardyń muń-múddesi, talap-tilekteri kóbine estilmeidi. Olar: «Qazaqstan memleketi alystap ketkendei», - dep otyr. Biz ministrlermen aýyl-aimaq, shalǵaidaǵy mekenderge birge baraiyq. Áleýmettik qorǵaý, Tsifrlyq damý, Bilim, Ekonomika, Ekologiia ministrleriniń shalǵaida jatqan bizdiń aǵaiyn, týǵan-týystyń únin estýi óte mańyzdy. «Qulaqpen estigen – ótirik, kózben kórgen – shyn» degen sóz bar», - dedi Májilis ókili.
Sondai-aq, depýtat sheneýnikterge kabinetten shyǵyp, azamattardyń turmys-tirshiligin óz kózderimen kórýdi usyndy.
«Shalǵaidaǵy aýylda internet salasynda, jol, oqý-aǵartý salasynda problema shash-etekten. Sheneýnikterge kabinetten shyǵyp, azamattardyń turmys-tirshiligin óz kózderimen kórýi óte mańyzdy. Úkimet músheleri Prezident Qasym-Jomart Toqaevtyń reformalar qarqynyna ilesýge qabiletti bolyp, halyqtyń áleýmettik ál-aýqatyn arttyrýǵa naqty qadamdar jasaýy kerek.
Úkimet halyqtyń kirisin arttyrý baǵdarlamasyn qabyldady. Al shynyna kelsek, halyqtyń ál-aýqaty kúnnen-kúnge tómendep barady. Halyqtyń basym kópshiligi bul baǵdarlama jóninde eshteńe estimegen, estise de sengileri kelmeidi. Sondyqtan osynaý mańyzdy, qajetti qujattarǵa senimsizdik paida bolady.
Meniń naqty usynysym, alda depýtattardyń óńirlerge sapary bar. Sol kezde ministrler kabinetiniń ókilderimen oblys, aýdan, shalǵai aýyldarǵa birge baraiyq. Qazirden jospardy birge jasaiyq. Bul saiasi turǵydan da óte mańyzdy másele», - dedi Erlan Sairov.
