Májilistiń jalpy otyrysynda depýtat Erlan Sairov Eýropadan júk tasymalynyń qiyndaýyna bailanysty fermeler shyǵynǵa batatynyn aitty, dep habarlaidy QazAqparat.
«Búgingi shielenisti halyqaralyq jaǵdai otandyq biznes ókilderiniń múddesine keri áser etýde. Shielenis aimaǵynda qazaqstandyq kásipkerlerge tiesili 1007 júk vagony turyp qalǵan, 680 júk vagony shielenis aimaǵyna jetpei toqtatylǵan. Tranzit quny eki esege ósip ketken. Logistikanyń buzylýyna bailanysty Eýropadan elimizge keletin tuqym, tyńaitqysh, ósimdikterdi qorǵaý quraldaryn jetkizý qiyndap ketken. Kóktemgi egistik jumystaryna tutynýǵa qajetti aýqymnyń 50-paiyzy ǵana jetkiziledi degen boljaý jasalýda. Al, importtan keletin ósimdikti qorǵaý quraldary egistikke qajet deńgeidiń 90-paiyzyn quraidy. Otandyq biznes ókilderi júzdegen million teńge shyǵynǵa ushyraýda. Úkimet qimyldap jatyr, biraq myna zamanda óte shiraq bolý mańyzdy», - dedi Sairov Úkimet basshysy Álihan Smaiylovtyń atyna joldaǵan saýalynda.
Osy oraida ol elimizdiń biznesi kóptegen halyqaralyq saýda brendilermen Resei arqyly jumys istegenin atap ótti.
«Ol brendiler kórshimizden jappai shyǵyp jatyr. Munai tasymaldaýdyń da problemasy qyltiyp tur. Nege Úkimet kezinde munai tasymaly, saýda brendteriniń balama logistikasyn oilastyrmaǵan?! Resei rýbliniń tez bosańsýy bizdiń elimizge kórshimizden azyq-túliktiń importynyń eselep ósýine alyp kelýi múmkin. Bul óz kezeginde qazaqstandyq azyq-túlik óndirýshilerdiń jaǵdaiyn múldem turalatyp jiberýi yqtimal. «Jyǵylǵan ústine judyryq» bolyp halqymyzdy baǵa men devalvatsiia alqymnan qysyp jatyr. «AMANAT» partiiasynyń sailaýshylary osy máseleler boiynsha alańdaýly», - dedi depýtat.
Osy turǵyda ol tiisti suraqtaryn joldady:
1. Qazaqstannyń tasymal logistikasyn ártaraptandyrýǵa qandai qadamdar jasalýda?
2. Halyqaralyq saýda brendteriniń Qazaqstanmen tikelei jumys isteýin qamtamasyz etý úshin ne istelip jatyr ?
3. Munai tasymalyn ártaraptandyrýǵa qandai áreket jasalýda ?
4. Jalpy, týrbýlenttilik kezeńinde, Qazaqstannyń ekonomikalyq múddesin qorǵaýdyń jańa filosofiiasy bar ma?
«Osy máseleni zańda belgilengen merzimde qarastyryp, jaýap berýińizdi suraimyz»,-delingen depýtattyń saýalynda.
