Almatyda qoǵamdyq keńistikterdi damytýǵa baǵyttalǵan keshendi baǵdarlama aiasyndaǵy jumystar jalǵasýda. Biylǵy alǵashqy jartyjyldyqtyń qorytyndysy boiynsha toǵyz nysandaǵy negizgi kórkeitý jumystary aiaqtaldy. Sonymen qatar, qalanyń iri aýmaqtaryn kóriktendirý jalǵasyp, jańa jobalar iske asyryla bastady. Bul týraly Almaty qalasynyń Qoǵamdyq keńistikterdi damytý basqarmasynyń ókilderi habarlady.
Qazirgi tańda Dostyq dańǵyly, Pýshkin kóshesi, Sairan kóliniń jaǵalaýy, Geologtar alleiasy, «Ońtústik» saiabaǵy, Baým toǵaiy, FLOW PARK, Respýblika alańy jáne «Atakent» Iskerlik yntymaqtastyq ortalyǵy aldyndaǵy alań paidalanýǵa daiyndaldy. Qazir bul nysandarda sońǵy árleý jáne túzetý jumystary júrgizilýde.
Kórkeitý barysynda júrginshiler aimaqtary jańartylyp, syrtqy jaryqtandyrý júieleri men avtomatty sýarý júieleri ornatyldy. Sondai-aq kógaldandyrý jumystary júrgizilip, shaǵyn sáýlettik nysandar, balalar jáne sport alańdary, zamanaýi demalys aimaqtary salyndy. Nysandardyń tehnikalyq daiyndyǵy turǵyndardyń olardy qazirdiń ózinde serýendeý jáne demalý úshin paidalanýyna múmkindik beredi.
Sonymen qatar, kórkeitý baǵdarlamasynyń kelesi kezeńderi de jalǵasýda. 2026 jyldyń sońyna deiin Tuńǵysh Prezident saiabaǵyn qaita jańǵyrtý, sondai-aq Timiriazev, Másanchi, Seifýllin, Jarokov, Jandosov, Rozybakiev, Sátbaev kósheleri men Abai dańǵylyn kórkeitý josparlanǵan. Al N. Sats atyndaǵy bplalar men jasóspirimder teatry mańyndaǵy skverdi kóriktendirý jumystary tamyz aiynyń sońyna deiin aiaqtalmaq.
Budan bólek, balalarǵa arnalǵan Ǵylym mýzeiiniń qurylysy júrip jatyr. Nysandy biylǵy jyldyń sońyna deiin paidalanýǵa berý josparlanǵan.
Qalada qoǵamdyq keńistikterdi damytýǵa arnalǵan jańa jobalar da bastaý aldy. Sonyń biri Áýejai kóli aýmaǵyn qaita jańǵyrtý. Bul jerde turǵyndarǵa arnalǵan zamanaýi demalys aimaǵyn qurý kózdelgen. Jańa jobalar qalalyq ortanyń sapasyn arttyrýǵa, demalys infraqurylymyn damytýǵa jáne jaily qoǵamdyq keńistikter qalyptastyrýǵa baǵyttalǵan.
Qoǵamdyq keńistikterdi damytý basqarmasynyń málimetinshe, barlyq nysanda qurylys-montaj jumystarynyń barysyna, tartylǵan tehnika men jumysshylar sanyna kún saiyn baqylaý júrgiziledi. Bul jobalardyń belgilengen merzimde aiaqtalýyn qamtamasyz etýge múmkindik beredi.
