Sailaýǵa bir apta qalǵanda partiialar óńirlerdegi jáne qoǵamdyq keńistiktegi belsendiligin arttyrýdy jalǵastyryp jatyr. 17 tamyzda jumys oryndary, otandyq biznesti qoldaý, ekologiia, baspana, densaýlyq saqtaý jáne infraqurylymdy damytý máseleleri basty nazarda boldy. «Ádilet» sarapshylarǵa «111+ sheshim» qujatyn tanystyrdy, «Baitaq» kandidattardyń óńirlerge sapary týraly esep berdi, al «Aq jol» biznes jáne bank sektory ókilderimen nesieleý men baspananyń qoljetimdiligi máselelerin talqylady. Óz kezeginde QHP JSDP-men pikirtalasyn jalǵastyrsa, «Aýyl» óndiris, logistika jáne ekologiia máselelerine nazar aýdardy.
«Ádilet» partiiasy 17 tamyzda sailaýaldy baǵdarlamasyn tanystyrýdy jalǵastyrdy. Kóterilgen taqyryptardyń qatarynda kreativti indýstriialardy damytý, otandyq óndirýshilerdi qoldaý, qazaqstandyq kompaniialardyń memlekettik jáne kvazimemlekettik satyp alýǵa qol jetkizýi, sondai-aq bilim berý men túlekterdi jumysqa ornalastyrý máseleleri bar.
Sonymen qatar partiia «Ádilet sózi» jobasyn jalǵastyryp, Astanada «Quryltai — 2026: saraptamalyq kózqaras» kezdesýin ótkizdi. Onda azamattardyń ótinishteri, áleýmettik zertteýler men saraptamalyq talqylaýlar negizinde ázirlengen «111+ sheshim» qujaty tanystyryldy.
Jalpyulttyq sotsial-demokratiialyq partiia Býrabaida fleshmob ótkizdi. Quryltai depýtattyǵyna kandidattar men partiia belsendileri Abylai han alańynda turǵyndarmen kezdesti. Qatysýshylar partiialyq rámizder men brendtelgen kiimderdi paidalandy.
«Baitaq» partiiasy ekologiialyq taqyryptar men óńirlerdegi kezdesýlerge arnalǵan is-sharalaryn jalǵastyrdy. «Kólsai kólderi» ulttyq parkinde bioalýantúrlilikti saqtaý, erekshe qorǵalatyn tabiǵi aýmaqtar, ekotýrizm jáne inspektorlardyń jumysyna qatysty máseleler talqylandy.
Jambyl, Aqtóbe, Almaty, Mańǵystaý jáne Pavlodar oblystarynda partiia ókilderi eńbek ujymdary jáne turǵyndarmen kezdesti. Kóterilgen máselelerdiń qatarynda ormandar men janýarlar dúniesin qorǵaý, qaldyqtardy qaita óńdeý, qorshaǵan ortanyń jaǵdaiy, káriz sýlary, sanitarlyq qaýipsizdik, densaýlyq saqtaý jáne salynýy josparlanǵan óndiristik nysandar bar.
Qazaqstannyń Halyq partiiasy eńbek ujymdary jáne túrli sala ókilderimen kezdesýlerin jalǵastyrdy. Abai, Shyǵys Qazaqstan jáne Pavlodar oblystarynda eńbek quqyqtary, eńbek jaǵdailary, tsifrlyq infraqurylym jáne jumyspen qamtý máseleleri talqylandy.
Qostanai oblysynda QHP atynan kandidat Nurjan Biiaqaev JSDP-nyń eńbek qatynastary men áleýmettik saiasat salasyndaǵy usynystaryna toqtalyp, osy máselelerge qatysty partiianyń ustanymyn bildirdi. «Halyq úni» podkastynda turǵyn úi saiasaty men baspananyń qoljetimdiligi máselelerine de nazar aýdaryldy. Sondai-aq partiia kandidattar tiziminiń genderlik quramy týraly málimetter usynyp, áielderdiń ókildigi men eńbekaqy máselelerin kóterdi.
«Aýyl» partiiasy Shymkentte munai óńdeý zaýytyna logistikalyq qyzmet kórsetetin «Qazyǵurt – ońtústik» kásipornynyń ujymymen kezdesti. Partiia tóraǵasy jumysshylarmen temirjol tasymalynyń tiimdiligin, infraqurylymdy jańǵyrtýdy, kadr daiarlaýdy, eńbek jaǵdailary men óndiristiń turaqtylyǵyn talqylady.
Atyraý oblysynda partiia belsendileri kandidat Nurtas Baijanovpen birge «Taza Qazaqstan» ekologiialyq aktsiiasyn ótkizip, Jaiyq ózeniniń jaǵasyn qoqystan tazartty.
«Aq jol» partiiasy eńbek ujymdary, biznes jáne bank sektory ókilderimen kezdesýlerin jalǵastyrdy. Atyraýdaǵy vagon jasaý zaýytynda otandyq óndiristi damytý, nesieleý, ipoteka, baspananyń qoljetimdiligi jáne derbes málimetterdi kollektorlarǵa berý máseleleri talqylandy.
Mańǵystaý oblysynda partiia ókilderi turǵyndarmen jáne kásipkerlermen kezdesip, otandyq ónimderdi qoldaý, biznesti qarjylandyrý jáne qaryzdardyń qoljetimdiligi máselelerin qarastyrdy. Astanada «Engineering Services» kompaniiasynyń ujymymen ótken kezdesýde meditsinalyq saqtandyrý, salyq salý jáne ipotekalyq nesieleý máseleleri talqylandy.
«Respublica» partiiasy azyq-túlik qaýipsizdigi men otandyq óndiristi qoldaýǵa basymdyq bere otyryp, óńirlerge saparlaryn jalǵastyrdy. Qostanai oblysynda kandidat Ernat Soltiev partiia shtabynyń kásiporyndarǵa barý jáne eńbek ujymdarymen kezdesýlerdi qamtyǵan sapary týraly aitty.
Kókshetaýda partiia ókilderi «Qazaqstandyq agroinnovatsiialyq korporatsiia» JShS-ne baryp, aýyl sharýashylyǵy mashina jasaý salasyn damytý jáne otandyq óndirýshilerdi qoldaý máselelerin talqylady. Partiia tóraǵasynyń orynbasary Oljas Quspekov jeńildetilgen lizing pen ýtilalym taqyryptaryna toqtaldy. Sonymen qatar tsifrlandyrý, taýarlardy tańbalaý jáne otandyq taýar óndirýshilerdi qoldaý máseleleri qarastyryldy.
Osylaisha, 17 tamyzda partiialar sailaýaldy naýqanyn birden birneshe baǵyt boiynsha jalǵastyrdy. «Ádilet» sarapshylarǵa «111+ sheshim» qujatyn tanystyryp, kreativti indýstriialar men otandyq óndirýshilerdi qoldaýǵa baǵyttalǵan bastamalaryn ilgeriletýdi jalǵastyrdy. JSDP Býrabaida úgit-nasihat fleshmobyn ótkizse, «Baitaq» ekologiialyq kún tártibi men óńirlerdegi kezdesýlerge, QHP eńbek quqyqtary, densaýlyq saqtaý, baspana jáne tsifrlyq infraqurylym máselelerine nazar aýdardy. «Aýyl» óndiristi, logistikany damytýǵa jáne ekologiialyq is-sharalarǵa, «Aq jol» biznesti qoldaý, nesieleý men baspananyń qoljetimdiligine, al Respublica azyq-túlik qaýipsizdigi, tsifrlandyrý jáne otandyq taýar óndirýshilerdi qoldaý máselelerine basymdyq berdi. Sailaýǵa sanaýly kún qalǵanda partiialar eńbek ujymdary, biznes ókilderi jáne óńir turǵyndarymen jumysyn jalǵastyryp, bir mezgilde ózderiniń baǵdarlamalyq basymdyqtary men básekelesterinen erekshelikterin kórsetýge tyrysyp jatyr.
