QR investitsiialar jáne damý ministri Jeńis Qasymbek qarjy tolyǵymen igerilip jatqanyn málimdedi, dep habarlaidy Sputnik Qazaqstan tilshisi.
Búgin úkimet otyrysynda investitsiialar jáne damý ministri premerdiń synyna ilikken bolatyn. Baqytjan Saǵyntaev Qasymbekten halyqaralyq banktermen qaryz jónindegi kelisimder memlekettik organdar tarapynan nege kelisilmei jatqanyn surady.
"Jeńis Mahmuduly, myna jerde jazylyp tur. Dúniejúzilik bankten, Islam bankinen qaryz alý jónindegi kelisim memlekettik organdarmen kelisýde. Qashanǵy kelisesizder, áriptesterińizdiń bári osy zalda otyr. 42,9 milliard teńge igerilmei qalýy múmkin degen qaýip bar. Onyń ishinde siz basqaryp otyrǵan ministrlikte joldar boiynsha – eń úlken kólem. Sonyń ishinde Islam banki, Dúniejúzilik bank beretin qaryzǵa áli memlekettik organdar arasynda kelisim júrip jatyr dep jazylǵan. Qashan bitedi bul kelisim? Sizder kelisip bitkenshe, qys túsedi ǵoi", — dep ashýlandy Saǵyntaev.
Úkimet kýlýarynda Qasymbek premerdiń synyna qatysty jaýap berdi.
"Úkimet otyrysynda aitylǵan birqatar joba boiynsha mindettemeler qarjylandyrýdyń bekitilgen kestesine sáikes ekinshi jartyjyldyqta qabyldanady. Bul Otar – Uzynaǵash, Balqash – Býrylbaital, bular boiynsha Dúniejúzilik bankpen jumys istep jatyrmyz. Sondai-aq, Qazaqstannyń batysynda eki joba bar: Aqtóbe – Qandyaǵash jáne Atyraý – Astrahan. Sońǵy eki joba boiynsha Islam bankimen kelissóz júrip jatyr. Birqatar sheshilmegen túiin bar, biraq jaqyn arada bul máselelerdi sheshemiz. Qarjylandyrý kestesi aiasynda josparlanǵannyń bári 100 protsent igerilip jatyr, artta qalǵan jobalar joq", — dedi investitsiialar jáne damý ministri.
