- Úkimettiń búgingi otyrysynda Premer-Ministr Baqytjan Saǵyntaev aýyl sharýashylyǵy salasyndaǵy kompaniialarǵa eskertý jasap, syrttan texnika ákelýge tyiym salynbasa da, otandyq óndiristi damytýǵa basymdyq beriletinin jekizdi, dep xabarlaidy QazAqparat tilshisi.
"Biz aýyl sharýashylyǵy salasyndaǵy sheteldik texnikanyń qaisysy jaqsy ekenin kópten beri talqylap kelemiz. «John Deer» ma, «Claas» pa, biraq, ózińiz kórip otyrsyzdar, 20 jyl boiy kelissózderdi júrgizip jatyrmyz. Alaida, bireýi de Qazaqstanǵa kelip, óz óndirisin ashpaidy. "Iá, senderge zaýyt salyp beremiz, texnikany qurastyramyz, shyǵaramyz!" dep jalaýlatady. Biraq áli kúnge deiin naqty nátije joq. Biz barlyq jaǵdailardy jasap berdik. Degenmen, «John Deer» da, «Claas» ta kelmei otyr. Sebebi olarǵa osy jerde óndiris ashqansha, daiyn ónimdi satyp, aqshany ala salǵan tiimdi. Jeńil paidany kózdeidi", - dedi B.Saǵyntaev.
Úkimet basshysynyń aitýynsha, endigi kezekte syrttan texnika ákelýge tyiym salynbasa da, aýyl sharýashylyǵy salasyndaǵy otandyq óndiristi damytýǵa kúsh salynady. "Búginde biz mashina jasaý ónerkásibin qolǵa aldyq. Traktorlar men kombaindardy qurastyra bastadyq. Endi, ony ary qarai damytý qajet qoi. Biz osy salany qoldaýǵa daiynbyz", - dep atap kórsetti Premer-Ministr.
Aita keteiik, búgingi otyrysta Úkimet basshysynyń orynbasary-Aýyl sharýashylyǵy ministri Asqar Myrzaxmetov Agroónerkásip keshenin damytýdyń 2017-2021 jyldarǵa arnalǵan baǵdarlamasyn tanystyrdy. Onyń aitýynsha, jańa baǵdarlama aiasynda aýyl xalqy milliardtap tabys tabatyn bolady.
Sondai-aq QazAqparat tilshisine suxbat bergen A.Myrzahmetov, "Qazaqstanǵa importtalatyn et tekserilmeidi" degen Esep komitetiniń qorytyndysyna jaýap berdi.
Al Densaýlyq saqtaý jáne áleýmettik damý ministri Tamara Dúisenova kásipkerlikti jappai damytýdyń jańa baǵdarlamasy týraly aityp berdi.
