Premer-ministr Baqytjan Saǵyntaev prezidenttiń bes áleýmettik bastamasynyń biri – jańa ipotekalyq baǵdarlamany júzege asyrý boiynsha úkimet múshelerine birqatar tapsyrma berdi, dep habarlaidy Sputnik Qazaqstan.
"Birinshi bastama — árbir otbasyna baspana alýdyń jańa múmkindikterin berý. Bul úshin Ulttyq bank arnaiy uiym qurý arqyly jańa ipotekalyq "7-20-25" baǵdarlamasyn daiyndaityn bolady. Onyń negizgi sharty, Elbasy atap kórsetkendei, nesie ósiminiń mólsherlemesi jylyna 7 protsentten, bastapqy jarnasy 20 protsentten aspaityn bolady. Nesie merzimi 25 jylǵa deiin", — dedi Saǵyntaev búgin úkimet otyrysynda.
Úkimet basshysy atap ótkendei, jańa baǵdarlama kóptegen qazaqstandyq úshin turǵyn úidiń qoljetimdi bolýyn qamtamasyz etedi.
"Investitsiialar jáne damý, ulttyq ekonomika, qarjy ministrlikteri men "Báiterek" holdingi atalǵan jumystarǵa kirisýi tiis. Jańa ipotekalyq baǵarlamany iske asyrý turǵyn úi qurylysyna jáne oǵan jaqyn salalardyń jumysyna tyń serpin beredi. Sondyqtan buǵan otandyq qurylys materialdaryn óndirýshi komaniialardy belsendi túrde tartý kerek. Ipotekalyq baǵdarlama boiynsha jaýaptylar — Ulttyq bank, úkimet tarapynan Investitsiialar jáne damý ministri Jeńis Qasymbek. Asqar Uzaqbaiuly (premer-ministrdiń birinshi orynbasary Asqar Mamin) sizdiń baqylaýyńyzda", — dedi úkimet basshysy.
Aita ketsek, keshe Elbasy Nursultan Nazarbaev «"Prezidenttiń bes áleýmettik bastamasy" atty halyqqa úndeýin jariialady.
