Búgin QR Prezidenti Nursultan Nazarbaevtyń tapsyrmasy boiynsha Premer-Ministr Baqytjan Saǵyntaev pen Prezident Ákimshiliginiń basshysy Ádilbek Jaqsybekov jańadan qurylǵan Túrkistan oblystyq máslihatynyń sessiiasyna qatysty, dep habarlaidy primeminister.kz.
Otyrys barysynda Premer-Ministr Baqytjan Saǵyntaev Túrkistan oblysynyń ákimi laýazymyna Janseiit Qanseiituly Túimebaevty taǵaiyndaý týraly usynysy jazylǵan Memleket basshysynyń oblystyq máslihat depýtattaryna joldaǵan hatyn oqyp berdi. Daýys berý qorytyndysy boiynsha depýtattar Prezident usynǵan kandidatýrany biraýyzdan qoldady.
J. Túimebaev 1958 jyly dúniege kelgen. S. M. Kirov atyndaǵy Qazaq memlekettik ýniversitetin jáne Máskeý memlekettik áleýmettik ýniversitetin támamdaǵan. Filologiia ǵylymdarynyń doktory. Ár jyldary QR Prezidenti Hattamasynyń jetekshisi, QR Prezidentiniń keńesshisi, QR-nyń RF-tegi Tótenshe jáne Ókiletti Elshisi, QR Bilim jáne ǵylym ministri, QR-nyń Túrkiia Respýblikasyndaǵy Tótenshe jáne Ókiletti Elshisi qyzmetterin atqarǵan. 2016 jylǵy qazan aiynan bastap Ońtústik Qazaqstan oblysynyń ákimi laýazymyn atqarǵan.
Budan keiin Premer-Ministr Baqytjan Saǵyntaev pen QR Prezidenti Ákimshiliginiń basshysy Ádilbek Jaqsybekov Túrkistan oblysynyń aktivimen kezdesip, jańa ákimdi tanystyrdy.
Baqytjan Saǵyntaev keshe Memleket basshysynyń tarihi sheshimimen elimizde jańa Túrkistan oblysy qurylǵanyn eske saldy.
«Túrkistan kóptegen ǵasyrlar boiy tek Ortalyq Aziianyń emes, sondai-aq búkil túrki áleminiń saiasi ári rýhani ómiriniń ortalyǵy boldy. Memleket basshysynyń kieli Túrkistandy oblys ortalyǵy retinde belgileýi týraly sheshimi óńirdi odan ári damytýǵa septigin tigizedi. Elbasynyń osy tarihi sheshimi jergilikti halyqtyń ómirin jaqsartýǵa, sondai-aq jalpy óńirdiń áleýmettik-ekonomikalyq damýyna oń yqpal etedi», - dedi B. Saǵyntaev.
Memleket basshysynyń tapsyrmalaryn oryndaý maqsatynda QR Premer-Ministriniń birinshi orynbasary A. Maminniń tóraǵalyǵymen Túrkistan qalasynyń túrki áleminiń mádeni jáne rýhani ortalyǵy retinde damýyna yqpal etetin Bas jospardy ázirleý boiynsha Úkimettik komissiia quryldy.
Tanystyrý barysynda Baqytjan Saǵyntaev J. Túimebaevtyń túrli jaýapty basshylyq qyzmetterdegi úlken jumys tájiribesin atap ótti.
Sondai-aq, kezdesý aiasynda jergilikti jurtshylyq ókilderi de sóz sóiledi.
Jazýshy Marhabat Baiǵut, qoǵam qairatkeri Sh. Myrzahmetov óńir atynan Memleket basshysyna halyqtyń rýhani kúsh-jigerin kóteretin jáne óńirdi damytýǵa jańa serpin beretin sheshim qabyldaǵany úshin alǵys birdirdi.
Aita keteiik, 19 maýsymda Prezidenttiń «QR ákimshilik-aýmaqtyq qurylysynyń keibir máseleleri týraly» Jarlyǵymen Ońtústik Qazaqstan oblysy Túrkistan oblysy dep qaita atalyp, ákimshilik ortalyǵy Túrkistan qalasy boldy.
