QR Premer-Ministri Baqytjan Saǵyntaev «Qazaqstan Respýblikasynyń Premer-Ministri, Premer-Ministriniń orynbasarlary jáne Premer-Ministri Keńsesiniń Basshysy arasynda mindetterdi bólý týraly» ókimge qol qoidy. Bul týraly QR Premer-Ministriniń baspasóz qyzmeti habarlady.
Qujatqa sáikes, Premer-Ministrdiń qaraýyna ekonomikalyq, qarjy, fiskaldyq jáne keden saiasatynyń, memlekettik biýdjettiń startegiialyq máseleleri, qorǵanys jáne quqyqtyq tártip, munai-gaz sektoryn damytý, memlekettik aktivterdi basqarý, memlekettik organdardyń ákimshilik reformasyn iske asyrý, memleketaralyq qatynastar men halyqaralyq yntymaqtastyq, sheteldik investitsiialar tartý, investitsiialyq ahýaldy jaqsartý jáne basqalary kiredi.
QR Premer-Ministriniń Birinshi orynbasary Asqar Maminnyń mindetterine ekonomikany jedel basqarý jáne óńirlik saiasat, kólik infraqurylymyn jáne logistikany damytý, qurylysty damytý jáne turǵyn úi-kommýnaldyq sharýashylyqty jańǵyrtý máseleleri jatady. Sonymen qatar Asqar Mamin qorǵanys-ónerkásip keshenin damytý, tótenshe jaǵdailar jáne jumyldyrý jumysy, ǵarysh qyzmeti, energiia únemdeý jáne energiia tiimdiligin arttyrý, energiianyń jańartylatyn kózderi, kómir ónerkásibi, atom ónerkásibi jáne iadrolyq energetika, innovatsiialar, tehnikalyq retteý, elektr energetikasy, geologiia jáne jer qoinaýyn paidalaný, munai himiiasy, eksporttyq baqylaý, qorshaǵan ortany qorǵaý, jylytý maýsymyna daiyndyq jáne ony ótkizý jáne basqa da máseleler kiredi.
Premer-Ministrdiń Birinshi orynbasarynyń qyzmet aiasyna sonymen qatar arnaiy ekonomikalyq jáne indýstriialyq aimaqtardy damytýdy úilestirý, Eýraziialyq ekonomikalyq odaq sheńberinde yntymaqtastyq máseleleri jatqyzylady.
QR Premer-Ministriniń orynbasary Erbolat Dosaevtyń mindetine el ekonomikasyn Úshinshi jańǵyrtýdy jobalyq basqarý, memlekettik josparlaý júiesi, qarjy sektoryn damytý, makroekonomikalyq, biýdjet, salyq jáne keden saiasaty, ShOB pen memlekettik-jekeshelik áriptestikti damytý, sonymen qatar bilim berý men ǵylymdy damytý, densaýlyq saqtaý, áleýmettik jańǵyrtý, jumyspen qamtý, din, týrizm, mádeniet jáne sport, demografiia jáne kóshi-qon saiasaty, tarif saiasatyn úilestirý jáne basqa da máseleler bekitilgen.
QR Premer-Ministriniń orynbasary Asqar Jumaǵaliev salalardy tsifrlandyrý jáne tsifrlyq ekonomikany damytý, aqparattandyrý, bailanys jáne aqparattyq qaýipsizdik, «elektrondyq úkimetti», aqparattyq tehnologiialardy damytý, memlekettik kórsetiletin qyzmetterdi avtomattandyrý, elektrondyq kommertsiia, spýtniktik bailanysty damytý, memlekettik aqparattyq saiasatty iske asyrý jáne basqa da máselelerdi úilestiredi.
Premer-Ministrdiń orynbasary Asqar Myrzahmetov agroónerkásiptik keshen, jer qatynastary, sý resýrstary, orman sharýashylyǵy, janýarlar álemi, aýyl sharýashylyǵy mashinasyn jasaý, aýylda nátijeli jumyspen qamtý jáne basqa da máselelerge jetekshilik etedi.
QR Premer-Ministri Keńsesiniń Basshysy Nurlan Aldabergenov Premer-Ministrdi jáne Úkimet basshylyǵyn aqparattyq-taldaý, quqyqtyq, uiymdastyrýshylyq, protokoldyq, qujattamalyq, materialdyq-tehnikalyq jáne ózge de máselelerdi qamtamasyz etýdi iske asyrady.
