Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda mádeniet jáne sport ministri Arystanbek Muhamediuly Ońtústik Koreianyń Phenchhan qalasynda ótetin XXIII qysqy Olimpiada oiyndaryna daiyndyq barysy týraly baiandady, dep habarlaidy "Ult aqparat".
HHIII qysqy Olimpiada oiyndary 2018 jyldyń 9–25 aqpan aralyǵynda ótedi. Álemniń 80-ge jýyq elinen 5000-nan astam sportshy men resmi tulǵalar qatysady dep josparlanǵan.
15 sport túrinen 102 medaldar jiyntyǵy oinatylady (biatlon — 11, bobslei — 3, skeleton — 2, kerling — 3, konkimen júgirý sporty — 14, mánerlep syrǵanaý — 5, short-trek — 8, taý shańǵy sporty — 11, shańǵy qossaiysy — 3 , shańǵy jarysy — 12, shańǵymen tramplinnen sekirý — 4, fristail — 10, snoýbord — 10, shana sporty — 4, shaibaly hokkei — 2).
Arystanbek Muhamediuly atap ótkendei, ulttyq quramanyń aldaǵy Olimpiada oiyndaryna 9 sport túri boiynsha 57 litsenziiasy bar: biatlon — 10, short-trek — 12, konkimen júgirý sporty — 12, shańǵy jarysy — 7, mánerlep syrǵanaý — 3, fristail mogýl — 4, fristail akrobatika — 5, taý shańǵy sporty — 2, shańǵymen tramplinnen sekirý — 1, shana sporty — 1.
«1994 jyldan 2010 jylǵa deiingi aralyqta ótken qysqy Olimpiada oiyndarymen salystyrǵanda, qazaqstandyq delegatsiia 2018 jyly ótetin Olimpiada oiyndaryna kóbirek litsenziiaǵa ie boldy», — dedi Arystanbek Muhamediuly.
Budan ózge, ministr Olimpiada oiyndarynyń bastalýyna deiin qysqy sport túrleri boiynsha ulttyq komandalar oqý-jattyǵý jiynymen jáne litsenziialyq jarystarǵa qatysýmen qamtamasyz etilgenin aityp ótti.
Joǵary nátijege qol jetkizýdiń mańyzdy faktory retinde sportshylardy sapaly quraldarmen jáne jabdyqpen qamtamasyz etý máseleleri sheshildi. Sondai-aq, Dúniejúzilik dopingke qarsy agenttik usynatyn qajetti sharalardy ýaqytyly jáne sapaly baqylaýǵa ári júzege asyrýǵa erekshe nazar aýdarylady.
«Olimpiadalyq delegatsiia aldyndaǵy mindet — Sochidegi Olimpiada oiyndarynyń qorytyndysynan tómen nátije kórsetpeý», — dep qorytyndylady Arystanbek Muhamediuly.
Atalǵan máseleni qaraý barysynda Ulttyq Olimpiada komitetiniń bas hatshysy Daniiar Ábilǵazin de sóz sóiledi.
Premer-Ministr Baqytjan Saǵyntaev ulttyq quramaǵa Olimpiada oiyndarynda jaqsy nátije kórsetýdi tiledi.
«Qysqy Olimpiada oiyndarynyń bastalýyna az ýaqyt qaldy, onyń ashylýyn asyǵa kútemiz jáne sportshylarymyzǵa sáttilik pen jeńis tileimiz. Sportshylarymyz el úmitin aqtap, medaldarmen oralady dep úmittenemiz», — dep tiledi Baqytjan Saǵyntaev.
