Almaty ákimi Baqytjan Saǵyntaev Alataý men Naýryzbai aýdandaryndaǵy jaryq pen aýyzsý máselesi qashan sheshimin tabatynyn aitty, dep habarlaidy QazAqparat.
«Men aptasyna bir ret «Almaty-live» arqyly halyqpen tikelei bailanysqa shyǵyp turamyn. Sol kezde qoiylatyn suraqtyń 50 paiyzy Alataý men Naýryzbai aýdandarynan kelip túsedi. Bular Almaty oblysynan qala quramyna keiin qosylǵan aýdandar. Bári infraqurylymnan beihabar qalǵan. Ne joly, ne joly, kárizi, jaryǵy kesheýildep, qalyp ketken. Endi Almaty qalasyna qosylǵannan keiin «Biz de qalanyń ortalyǵyndaǵy turǵyndar paidalanyp otyrǵan qyzmetterdi paidalanýǵa qaqylymyz, ákimshilik sony bizge jasap bersin» deidi. Durys talap. Ol úshin biz ne istep jatyrmyz? Birinshiden, Jańa Almatynyń keshendi damý jospary bar», - dedi qala ákimi Ortalyq kommýnikatsiialar qyzmetinde ótken brifingide.
Sondai-aq, ol jaz shyqsa, sýdy «vodovozben» tasityn eldi mekenderdiń máselesine toqtaldy.
«Mysaly Naýryzbai aýdanynda sý jetpeidi. Jazdyń keibir kúnderi «vodovozben» sý ákeledi. Qarańyz, HHI ǵasyr, «vodovozben» sý tasimyz. Nege? Sýdyń kólemi jetpeidi. Óitkeni taý jaqtan ákeletin sý qondyrǵysynyń qýaty tómen. Halyq sany ósip jatyr. Sý keletin qubyrdyń ózi kishkene. Al jazda jer úide turǵan soń, árqaisynyń aýlasynda baqsha bar. Ony kútýge de sý kerek. Jazda sý deńgeii osy sebepti túsedi», - dedi ákim.
Onyń aitýynsha, atalmysh aýdannyń halqy taý ózenderiniń sýyn tutynyp otyrǵandyqtan, jańbyr jaýǵan saiyn sý sapasy nasharlaitynyn aitady.
«Ekinshiden, jańbyr jaýsa, Qarǵaly ózeniniń sýy lailanady. Iaǵni, súzgi joq. Sol sebepti biz Naýryzbai aýdanynda eki jumysty qatar bastadyq. Kelesi jyly Aqjardaǵy problemany sheshemiz. Endi joǵary jaqtan sý ákelý máselesi bar. Qazirgi súzginiń kúshi jetpegendikten, Aqsai shatqalynda salynyp jatqan plotinadan, 3,5 shaqyrym jerden úlken diametrli qubyrmen sý tartyp jatyrmyz. Keleshekte ol mańda úlken súzgi men sý jinaityn keshen salýymyz kerek. Jobasyn Úkimet qoldap, kelesi jyldyń biýdjetine qosty. Kelesi jyly úlken qurylys bastalady.
Eki jyldyń ishinde tek Naýryzbai aýdanyn ǵana emes, Almaty oblysynyń Qaskeleń aýdanyndaǵy qosymsha bes eldi mekenge sý beretin múmkindik alamyz. Sondai-aq, Qarǵalynyń Quramys jaǵyndaǵy arnadan sý alatyn sol tóńirektegi 50 myńnan astam massiv kóktemde sý alatyn bolady», - dedi shahar basshysy.
Baqytjan Saǵyntaev bul aýdandarda jaryq jii óshpes úshin búkil transformatorlardy memleket menshigine qaitarý bastalǵanyn atady.
«Jaryqtyń jii óshetini týraly aitsaq, kezinde bul aýyldy eldi mekender bolǵan. Almaty oblysyna qaraǵan kezde elektrmen jabdyqtaý isi túgel jeke qoldarǵa ótip ketken. Olar óz tarifterin qoiady, biraq jóndeý jumystaryn júrgizbeidi. 2019 jyly qalanyń quramyna ótkende halyq ol problemasyn aitty. Qazir sonyń bárin memleketke qaitaryp jatyrmyz. Búgingi tańda sý, jaryq, káriz jelisi boiynsha 1000-ǵa jýyq nysandy memleketke qaitaryp, keiin monopolist kompaniialarǵa ótkizip jatyrmyz. Ol da ońai sharýa emes. Bir ǵana nysandy memleket menshigine sot arqyly qaitarý úshin 6 ai ketedi. Bolashaqta iesiz nysannyń bárin qabyldap alamyz», - dedi Almaty ákimi.
