Úkimet basshysy Baqytjan Saǵyntaev bólingen qarajatty igere almai jatqan ministrlerge eskertý jasady, dep habarlaidy QazAqparat tilshisi.
Aita ketsek, búgin Úkimet otyrysynda ministrler 2018 jyldyń 5 aiyndaǵy qorytyndysy boiynsha respýblikalyq biýdjettiń oryndalýy týraly baiandama jasap jatyr.
Óz kezeginde QR Ulttyq ekonomika ministri Timýr Súleimenov qurylys salasynyń damý jaiy jyl boiy birkelki emes serpindi kórsetip otyrǵanyn aitqan bolatyn. Ministrdiń aitýynsha, qurylys salasynyń ósý serpini birinshi toqsanda 5,9 paiyzǵa ulǵaiǵanymen, qańtar-mamyrdyń qorytyndylary boiynsha 0,3 paiyzdy, iaǵni nóldik mánge qarai jaqyndaǵan. Báseńdeý Pavlodar munai-himiia zaýytyn jańǵyrtý boiynsha, magistraldi qubyrlar men ónerkásiptik obektilerdiń, sondai-aq «Ábý-Dabi Plaza» kóp fýnktsiialyq keshenniń qurylysy boiynsha jumystardyń tómendeýimen bailanysty bolyp otyr.
Ministrlerdiń baiandamasyn tyńdaǵan Baqytjan Saǵyntaev negizgi máseleni kóldeneń tartty.
«Negizgi, bizdiń máselelerdiń barlyǵy tek qana qurylysta. 275 mlrd teńge 2018 jylǵa qabyldaǵan bolsaq, qalǵan mindettememiz - 178 mlrd teńge. Iaǵni, alda áli 100 mlrd teńgege mindettemeler qabyldaý kerek. Onyń ishindegisi 5 aidyń ishinde 42 mldr teńgeniń ǵana jumysyn atqarǵanbyz. Al ýaqyt ótip bara jatyr. Qazan aiynan bastap kún sýytyp, jol salý máselesi, Jeńis Mahmuduly, basqa da qurylystar máselesiniń bárinde óte aýyr jaǵdai qalyptasady. Sonda qalai muny igeremiz?», - dedi Úkimet basshysy.
Baqytjan Saǵyntaev eger de shyn máninde qarjy igerilmese, alty aidyń qorytyndysymen aqshanyń bárin keri qaitarý kerektigin atap ótti.
«Bostan-bos ustap otyrǵannan góri, basqa ministrlikterdiń tarapynan suranystar túsip jatyr. Óziniń jolymen shyǵyp, aqshany ýaqytynda tiimdi igerý qajet. Joldarǵa úlken tapsyrmalar boldy, Jeńis Mahmuduly. Qaýip bar. Mádeniet jáne sport ministrligi vizit-ortalyqtaryn soǵyp bitem degenshe týristik maýsym ótip ketedi. Áli konkýrs ótpegen. JSQ-sy joq. Onda aqshany nege surady? Aýyl sharýashylyǵy, Qarjy ministrligi de... Qosymsha mine, qarjy surap otyrsyzdar. 42 mlrd degen daiyn tur, mine. Alý kerek te - basqa salaǵa salý kerek. Báribir odan paida joq», - dedi ol.
Sóz sońynda Úkimet basshysy ministrlerge eskertý jasady.
«Elbasynyń tapsyrmasy boiynsha Úkimet qarjyny bóldi. Parlament qoldady. Biýdjet qabyldandy. Biraq, qarjy igerilmeidi. Qashanǵy kútip otyramyz? Ne ekonomikada ósim joq, ne halyqtyń aldynda aitatyn sóz joq. Esep berilgen kezde bárin de qatyryp jatyrmyz dep aitamyz. Odan keiin bári umyt qalady. Aitpady demeńizder, qurmetti áriptester! Sońǵy sóz - jarty aidyń qorytyndysynan keiin bólingen, alaida igerilmegen qarjy basqa salaǵa jumsalatyn bolady. Ary qarai ózderińiz bilesizder. Halyq pen Elbasynyń aldynda ózderińiz jaýap beresizder», - dedi Baqytjan Saǵyntaev.
