Sheteldik investorlardyń qyzmetkerlerine de áleýmettik jaǵdai jasaý qajet. Bul týraly búgin Úkimet otyrysynda QR Premer-Ministri Baqytjan Saǵyntaev aitty, dep habarlaidy "Ult aqparat".
Úkimet basshysy elimizde Iskerlik keńester, fiznes forýmdar, investitsiialyq forýmdar jii ótetindigin jáne olarǵa taldaý jasaý qajettigin atap ótti.
«Forýmdarda kóptegen memorandýmdarǵa qol qoiamyz. Sońy nemen bitedi? Máselen, qazir árbir oblysta investitsiialyq forýmdar ótip jatyr. Ol jaqsy, ár oblystyń múmkindigin kórsetý qajet. Sol investitsiialyq forýmdarda qol qoiylǵan memorandýmdardyń qansha paiyzy iske asyrylýda? Eger iske asyrylmasa sebebi ne?», - dedi Premer-Ministr.
Sonymen qatar ol Qazaqstan ekonomikasyna investitsiia salatyn investorlardyń ózderine de, qyzmetkerlerine de áleýmettik jaǵdai jasaý máselesine toqtaldy.
«Olar osynda qarjy quiǵannan keiin qyzmetkerlerin ákeledi. Sol kezde tirkeý jumystary, elektrondy viza máselesi, tipti balalaryn mektepke, balabaqshaǵa ornalastyrý, meditsinalyq kómek kórsetý máseleleri qalai sheshilip jatyr, qandai deńgeide kóterip jatyr? Meiramhanalardyń qyzmet kórsetýi syndy máselerdi de sheshý qajet», - dedi Baqytjan Saǵyntaev.
Eske sala ketsek, Úkimet otyrysynda QR Investitsiialar jáne damý ministri Jeńis Qasymbek Tikelei investitsiialar qoryn qurý máselesi pysyqtalyp jatqanyn málim etti.
