QR Premer-Ministri Baqytjan Saǵyntaev meningokokk infektsiiasyna qarsy kúrestegi Densaýlyq saqtaý ministrliginiń jumysyn synǵa aldy, dep habarlaidy "QazAqparat".
Premer-Ministr kún tártibine kirispesten buryn Densaýlyq saqtaý ministri Eljan Birtanovtyń meningokokk infektsiiasynyń taralýy týraly esebin tyńdady.
"Degenmen de, Eljan Amantaiuly, bul másele rasynda da halyq arasynda alańdaýshylyq týǵyzyp otyr. Sol sebepti, jai ǵana aityp ótken az, aqparattyq-túsindirme jumystaryn jandandyrý qajet. Áleýmettik jelide kóp talqyǵa túsip jatyr. Sizder aitqan málimdemeler birine jetse, birine jetpeidi. Eger shtab qursańyz, shtab jumysy jariia túrde júrgizilýi kerek. Ár oblysta atqarylyp jatqan jumystardy, árbir bolǵan jaǵdaidy túsindirý kerek", - dedi Baqytjan Saǵyntaev.
Sonymen birge, Premer-Ministr vaktsinany egý nemese ekpeý suraqtarynyń týyndap otyrǵanyn basa aitty.
"Keshe úlken kásiporynnyń basshysy keldi, "Jumysshylarymnyń arasynda alańdaýshylyq bastaldy, olarǵa egý jumysyn júrgizeiin be, júrgizbeiin be?" dep surady. Ony aityp, túsindirip jatqan eshkim joq. Vaktsinany óz erkimen alý, egý máselesi de halyq arasynda kúnnen-kúnge kóterilip kele jatyr. Baǵasy óte qymbat. Bir oblysta 40 myń, bir oblysta 20 myń turady. Osyndai jaǵdai bop jatqanda ministrlikter, qurmetti ákim myrzalar, sizder de baqylaýǵa alyp, kereginshe kómek kórsetip, baǵasyn túsirý kerek. Dúrligýge jol bermeý kerek", - dedi Saǵyntaev.
Ol aýrýhanalardyń kelýshilerdi oblysqa qarasty, qalaǵa qarasty dep qabyldamaitynyn da eske saldy.
"Mundai máselelerdi jyldam sheshý kerek qoi, Eljan Amantaiuly. Keshe oqyp otyrmyz, Talǵardan Qaskelenge deiin eki saǵat. Al anasy balasyn úsh saǵatta joǵalttym dep otyr. Talǵardan Qaskelenge jetkenshe qai zaman? Nege osyndai máselelerdi jedel túrde buiryqtaryńyzdy berip, sheshim shyǵarmaisyzdar? Ákimderdiń sheshimi bolsa, ákimderge aitý kerek, mundai jaǵdailarda barlyq aýrýhanaǵa tapsyrma bersin, osy infektsiiamen kelgen naýqastyń bárin birden qabyldasyn. Bul jóninen kemshilikter bar. Búgin jolǵa shyqsańyz, bárin óz kózińizben kórip, qajetti sheshimderdi qabyldap, halyqqa túsindirý jumystaryn júrgizińiz", - dep óz sózin túiindedi Premer-Ministr.
