Almaty ákimi Baqytjan Saǵyntaev qala aktiviniń otyrysynda megapoliste muǵalimderdi qoldaý men mektep qurylysynyń qarqyny týraly aitty, dep habarlaidy QazAqparat.
«Memleket basshysy bilimge, muǵalimderge qoldaý kórsetýge, olardyń eńbek jaǵdailaryn jaqsartýǵa erekshe nazar aýdardy. Máselen, jyl basynan beri muǵalimderdiń jalaqysy 25 paiyzǵa ósti. Almatyda jas muǵalimniń ortasha jalaqysy 157 myń teńge. Bul soma 2022 jylǵa qarai 183 myń teńgege jetedi»,- deidi ákim.
Pedagogtardyń motivatsiiasy men biliktilik deńgeiin arttyrý, bilim berý qyzmetkerleriniń kadrlyq áleýetin damytý úshin «Almaty mektepteri» qalalyq baǵdarlamasy júzege asyrylatyn bolady.
Bul rette Memleket basshysynyń tapsyrmasyna sáikes qashyqtan bilim berý formattary úshin aqparattyq júielerdiń sapasyn arttyrý máselesi pysyqtalatyn bolady.
Budan basqa, 2025 jylǵa qarai barlyq bilim berý uiymdarynda qoljetimdilikti qamtamasyz etý jáne inkliýzivti bilim berý jumysy jalǵasatyn bolady.
B. Saǵyntaev bilim basqarmasyna halyqaralyq pándik olimpiadalardyń jeńimpazdary men júldegerlerin joǵary oqý oryndaryna konkýrstyq negizde túsýge granttarmen qamtamasyz etý máselesin pysyqtaýdy tapsyrdy.
Daryndy balalardy jan-jaqty qoldaý, olarǵa bir rettik aqshalai syiaqy tóleý, sondai-aq daryndy oqýshylardy tárbielegen muǵalimderdi kótermeleý múmkindigi de qarastyrylatyn bolady.
Áleýmettik qorǵalmaǵan otbasynan shyqqan 23 myń balaǵa jappai bilim berý qorynyń kómegi kórsetildi. Jańa oqý jylynyń bastalýymen «Mektepke jol» aktsiiasy arqyly 800 million teńgeden astam kómek kórsetildi. Sonymen qatar, osy sanattaǵy balalar mektepte tegin tamaqtanatyn bolady.
Negizgi máselelerdiń biri – oqýshy oryndarynyń tapshylyǵyn azaitý. Biyl 3,5 myń oqýshyǵa arnalǵan 11 jekemenshik mektep ashyldy, 4 150 oryndyq 9 jańa ǵimarat paidalanýǵa berildi. Taǵy 8 mektep qazan aiynyń sońyna deiin paidalanýǵa beriledi.
Memleket basshysynyń 2025 jyldyń sońyna deiin myń mektep qurylysy boiynsha qoiǵan tapsyrmasyn oryndaý maqsatynda Almaty ákimi Baqytjan Saǵyntaev oqýshy oryndaryn ulǵaitý boiynsha sharalar men jańa tásilder keshenin ázirleýdi tapsyrdy.
