Syrttaǵy qazaq qandaida bir qiyndyqqa tap bolsa, eldegi qazaqtyń mazasy ketetini belgili. Kúni keshe ǵana Mońǵoliiadaǵy qazaqtar qonystanǵan Baian-Ólgei aimaǵynda nóser jaýyn jaýyp, 275 otbasynyń sý astynda qalǵanyn aqparat quraldarynan estip, bildik.
Búginde tasqyn sýdyń zardabyn joiýǵa Mońǵoliianyń aimaqtyq TJD, Qarýly kúshterdiń №340 bólimi, Bailanys orny qyzmetkerlerinen quralǵan 124 adam jáne 24 tehnika jumyldyrylǵany jaiynda habar aldyq.
Bizge jetken habar boiynsha 163 adamdy qaýipsiz jerge kóshirip, 95 adamdy Ólgei qalalyq №6 orta mekteptiń jataqhanasyna ornalasqan. Adam shyǵyny joq, alaida seldiń saldarynan materialdyq shyǵynǵa batqan turǵyndar bar eken.
Ázirshe tasqyn sýdan zardap shekken Ólgeige qol ushyn berýge Saǵyntaev Úkimeti asyǵar emes.
2016 jyly Baian-Ólgeidegi qazaqtar tasqyn sýdyń astynda qalyp, qiyn jaǵdaiǵa tap bolǵanda eldegi jurttyń syn-eskertpesinen keiin, sol kezdegi eks-premer Kárim Másimov Mońǵoliiaǵa atbasyn buryp, tilsiz jýdan japa shekken qandastardyń kóńilin aýlap, hal-jaǵdaiyn bilip, Qazaqstan Úkimeti tarapynan 200 myń dollar (ne degen kóp aqsha deseńizshi) mólsherinde qarjylai qoldaý kórsetken-di.
Ólgeidegi qandastyramyz Másimovke «200 myń dollar qai jyrtyǵymyzǵa jamaý bolady» dep ókpe-renishin aitqan joq. Qaita Úkimet basshysynyń izdep kelgenine máz bolyp, bar qiyndyqty umytqany esimizde.
Aitpaqshy, dál sol sátte belgili ánshi Ómirqul Ainiiazov 200 myń dollarǵa áreń degen de úi salǵanyn aityp, munshama aqshaǵa ne isteýge bolatyn aityp bergeni de esimizde.
Ózge bir elderdi sý alyp, órt shalsa milliondaǵan dollardy oilanbastan bere salatyn Qazaqstan Úkimetiniń qandastyramyzǵa 200 myń dollardan artyq aqsha bere almaǵanyna qarynmyz ashqan edi.
Bizdiń bilik ótken jyldan beri Reseidiń shashbaýyn kóterip, Siriiada qyryq pyshaq bolǵan taraptardyń basyn qosyp, olardyń bárin Astanaǵa aldyryp, bar jaǵdaiyn jasap, araǵaiyn bolyp jatqanyn bárimiz bilemiz.
Iá, bul resmi Astananyń dúniejúzindegi bedelin kóterý úshin qajet dúnie ekenin talai sheshender jaqtary talǵansha aityp, sanamyzǵa quiǵany jasyryn emes.
Eger tasqyn sýdyń astynda qalǵan Ólgeidegi qazaqtarǵa Úkimet qol ushyn berse, abyroi-bedeldiń astynda qalyp, Saǵyntaev Úkimeti halqynyń aldynda qurmet-qoshemetke bólenip shyǵa kelmei me?
Biraq bizdiń bilik eldegi qazaqtardyń aldynda súikimdi bolǵannan góri ózge eldiń aldynda abyroily, aibarly kóringendi jón sanaityn ádeti bar emes pe?
Osy turǵydan alyp qaraǵanda, aldaǵy ýaqytta Baqytjan Saǵyntaevtyń Mońǵoliiaǵa baryp, at minip, shapan kigen Másimovtyń «erligin» qaitalai ala ma degen suraq kókeiimizge qonaqtap qaldy.
Eger Saǵyntaev Mońǵoliiaǵa buryp, Ólgeidegi qandastarymyzdyń hal-jaǵdaiyn surasa, ondaǵy jurt topan sý tobyǵynan kelmegendei ǵajaiyp kúige túsip, adam aýyzben aityp jetkize almaityn eiforiiany bastan kesher edi.
Nurlan JUMAHAN
