Almaty qalasynyń ákimi Baqytjan Saǵyntaev Zerdelidegi "qisaiǵan úi" turǵyndaryn ýaqytsha basqa jaqqa kóshirýge ýáde berdi. Ákim bul sózin 14 jeltoqsanda tús kezinde ǵimarattyń qaýipsizdigine alańdap, mektepke jinalǵan júzge tarta turǵyn aldynda aitty.
- Sizderdi kóshirý týraly sheshim qabyldadyq. Oǵan aqsha bólindi. Aqsha aýdandyq ákimniń shotyna túsedi, - dedi Baqytjan Saǵyntaev.
Bir aptadan beri ózderi turyp jatqan toǵyz qabatty ǵimarattyń bir jaqqa qarai qisaiǵanyna shaǵymdanyp kelgen Almatynyń "Zerdeli" (burynǵy - Alǵabas-6) shaǵyn aýdanyndaǵy №179 úi turǵyndary senbi kúngi jinalysta bilikten "apatty úidiń" jaramdylyǵyn anyqtap, baspana máselesin sheship berýdi talap etken edi.
- Alǵashqy jumys kúni (18 jeltoqsan - red.) aqsha túsedi. Turatyn páterdi ne ózderińiz, ne biz taýyp beremiz. Bir ai bola ma, eki ai bola ma - anyqtaimyz. Zertteý úide turýǵa bolmaidy dese, úidi kúreimiz. Úi kúrelse, ákimdik esebinen turǵyndarǵa jańa úi beriledi. Japsarlas jatqan barlyq úi zertteledi, - dedi Baqytjan Saǵyntaev.
Jinalys kezinde narazy jurt jantaiǵan úidi salǵan "AGS Plast" kompaniiasynyń ókilinen jaýap alýdy talap etti. Biraq Almaty ákiminiń orynbasary Muhit Ázirbaev "Bizde áli zertteý qorytyndysy joq. "Kinásizdik prezýmptsiiasy" degen bar. Úidiń ahýalyn anyqtap alaiyq. Kinálilerdi sosyn tabamyz" dedi.
Almaty qalasy prokýrorynyń birinshi orynbasary Berik Adamov ta "memlekettik jáne táýelsiz qorytyndyny zertteimiz, qorytyndysy shyqqannan keiin árbir kezeń boiynsha (jobalaý kezeńi, ǵimaratty salý kezeńi t.s.s - B.A) atqarylǵan jumystarǵa baǵa beremiz" dedi.
Qazaq qurylys jáne sáýlet ǵylymi-zertteý jáne jobalaý institýtynyń atqarýshy direktorynyń aitýynsha, úi 7,5 santimetrge qisaiǵan. Al turýǵa jaramsyz dep taný úshin 8 santimetr bolýy kerek.
"Zerdelidegi" №179 úidiń "qisaiǵany" týraly aqparat birneshe kún buryn taraǵan. Jergilikti BAQ-tyń jazýynsha, buǵan deiin ákimdiktiń arnaiy basqarma mamandary úidi tekserip, "úi turýǵa jaramdy" dep málimdegen. Al ǵimarattyń joǵary jaǵynan tómenge jip tastap, "óz betimen tekseris jasaǵan" turǵyndar úi "12-15 santimetrge qisaidy" dep aitqan edi. 14 jeltoqsanǵa qaraǵan túni turǵyndardyń qorqyp, ǵimarat ishine kire almaǵany, keibir adamdardyń kóship jatqany belgili bolǵan .
2013 jyly "Qoljetimdi baspana" memlekettik baǵdarlamasy boiynsha paidalanýǵa berilgen bul turǵyn úide 72 páter bar.
Almatyda "úilerdiń qisaiý máselesi" osydan birneshe jyl buryn da baiqalǵan. 2016 jyly Alǵabastaǵy toǵyzqabatty turǵyn úidiń 32 santimetrge qisaiǵany anyqtalyp, jergilikti bilik olardy súrý kerek dep málimdegen.
