Biyl «Nurly jer» turǵyn úi qurylysy baǵdarlamasyn iske asyrý aiasynda 10 millionnan astam sharshy metr turǵyn úi paidalanýǵa beriledi. Bul týraly Premer-Ministr Baqytjan Saǵyntaevtyń tóraǵalyǵymen ótken QR Úkimeti otyrysynda investitsiialar jáne damý ministri Jeńis Qasymbek málimdedi, dep habarlaidy "Ult aqparat".
J. Qasymbektiń aitýynsha, osy jyldyń toǵyz aiynyń qorytyndysy boiynsha turǵyn úi qurylysyna 591,3 mlrd tg investitsiia salynǵan, sonyń ishinde 108,4 mlrd teńgesi — memlekettik investitsiialar. 7,9 mln m2 turǵyn úi paidalanýǵa berilgen, bul ótken jyldyń deńgeiimen salystyrǵanda 10,2%-ǵa joǵary kórsetkish. Jalpy turǵyn úidi paidalanýǵa berýdiń jyldyq josparynyń 78,2%-y oryndalǵan. Barlyǵy 70 myń páter salynǵan.
Turǵyn úi qurylysy aýdandaryna qajetti infraqurylymdy júrgizýge 83,4 mlrd teńge qarastyrylǵan. Olardyń ishinde qarjylandyrý josparyna sáikes jergilikti atqarýshy organdarǵa (JAO) 57,4 mlrd teńge aýdarylǵan, 54,2 mlrd teńgesi (94,4%) igerilgen. Jeke turǵyn úi qurylysyn damytý úshin 60 myńnan astam jer telimine injenerlik kommýnikatsiia jelilerin salý jumystary júrgizilip jatyr.
Budan ózge, biyl satyp alý quqyǵynsyz beriletin arendalyq turǵyn úi qurylysyna 25 mlrd teńge bólindi. 5 936 páterdiń qurylysy bastaldy, olardyń 2 697 páteri biyl paidalanýǵa beriledi dep kózdelgen. Jospardaǵy 8 495 páter kezinde, JAO nesielik turǵyn úi baǵyty boiynsha jyl basynan beri 3 731 páter (250 myń m2) paidalanýǵa berildi jáne jyl sońyna deiin taǵy 4 764 páter (273,5 myń m2) paidalanýǵa beriledi. 14 óńirde ekinshi deńgeili bankter halyqqa jańa turǵyn úi satyp alýǵa jeńildikpen ipoteka bere bastaǵany atalyp ótti. Búginde bankterge 7 mlrd teńgege 700 ótinim kelip túsken, olardyń ishinde 6,6 mlrd teńgege 650 ótinim maquldanǵan. 10 qazanda Úkimettegi daýys berý kezinde baǵdarlamaǵa arnalǵan ózgerister paketiniń jobasy maquldandy. Negizgi ózgerister nesielik jáne jeke turǵyn úi qurylysynyń kólemin ulǵaitý úshin ákimdikterge kvazimemlekettik sektor sýbektilerin qaita bólýge qatysty. Sondai-aq, ákimdikterge ótkizilmegen nesielik turǵyn úilerdiń bir bóligin kezekte turǵandarǵa bólip berý úshin satyp alý múmkindigi beriledi. «Jalpy, engizilip jatqan ózgerister baǵdarlama tetikterin ózekti etedi, al júrgizilip jatqan sharalar baǵdarlamanyń barlyq baǵyttaryn ýaqytyly ári tiimdi iske asyrýǵa jáne biyl 10,1 mln m2 nemese 99 myń páterdi paidalanýǵa berýge múmkindik beredi», — dep sózin qorytyndylady J. Qasymbek.
Óz kezeginde Úkimet basshysy: «Óńirler arasynda belgili bir úilespeýshilik bar. Osy oraida josparlaý durys iske asyrylmaýda. Sonymen qatar Parlamentte depýtattar da mektep qajettiligi máselesin kótergen bolatyn», - dep toqtaldy.
Bul turǵyda B. Saǵyntaev baspanaǵa qajettilik pen qurylys aýqymy arasyndaǵy teńgerimsizdik oryn alǵan málimetterdi jariia etti.
«Almaty oblysynda 37 myńǵa jýyq adam kezekte turǵan bolsa, jyldyq jospar 82 páter ǵana. Qaraǵandy oblysynda kezekte 35 myń adam tursa, jyldyń ishinde 387 páter eskerilgen. Mańǵystaý oblysynda kezekke 17 myń tirkelse, jyldyq jospar - 1 132. Al Aqtóbede kezekte 26 myń adam turǵan bolsa, jyldyq jospar 2 600-ge teń», - dedi Premer-Ministr.
Úkimet basshysy birinshi orynbasary Asqar Maminge bul máseleni jeke baqylaýǵa alýdy tapsyrdy.
«Saladaǵy osy jaǵdaidy pysyqtaý kerek. Árine, qurylys aýqymy joǵary óńirler qoldaýǵa laiyq, alaida suranys joǵary jerlerde múldem qurylys baiqalmaidy. Bundaiǵa jol berilmeýi kerek», - dep túiindedi sózin B. Saǵyntaev.
