Búgin úkimet otyrysynda premer-ministr Baqytjan Saǵyntaev ishki ister ministrliginiń jumysyn synǵa aldy, dep habarlaidy Sputnik Qazaqstan tilshisi.
Búgin Úkimet otyrysynda Shyǵys Qazaqstan oblysynyń ákimi Danial Ahmetov óńirdegi sý tasqynyna bailanysty baiandama jasaǵan bolatyn. Oblys ákimi tótenshe jaǵdailar departamentinde motopompa, gidrokombinezon, qaiyq – bári tapshy ekenin aitty.
Úkimet basshysy QR ishki ister ministriniń birinshi orynbasary Janat Súleimenovten munyń sebebin surady.
"Bul másele boiynsha biz demalys kúni ulttyq ulan ushaǵymen Ońtústik Qazaqstan, Almaty, Pavlodar oblystarynan jeke quram men tehnikalar jetkizdik", — dedi Súleimenov.
"Ol durys endi, joq bolǵannan keiin basqa oblystardan alyp otyrsyz ǵoi. Al Danial Kenjetaiuly aityp otyr, norma boiynsha osynsha bolý kerek, al shyn máninde óte tómen dep. Ministrlik tarapynan qandai sharalar jasalyp jatyr", — dep naqtylady premer.
Biraq IIM vitse-ministri qolynda daiyn baiandamasy bolmaǵan soń, jaýap bere almai qinaldy.
"Árine, aldyńyzda baiandama joq, sonda sizder qalai basqarasyzdar? Baiandamada jazylǵandy oqisyzdar, jazbasa jaǵdaidyń ne bolǵanyn bilmeisizder. Osydan keiin tótenshe jaǵdaiǵa dýshar bolamyz, tehnika joq, kombinezon joq, motopompa joq. Qiyn jaǵdai bolsa, kórshi oblystardan surap alamyz", — dep ashýlandy Saǵyntaev.
