Qazaqstannyń premer-ministri Baqytjan Saǵyntaev Nursultan Nazarbaevtyń atyna Qazaqstannyń energetika ministri Qanat Bozymbaevqa sógis jariialaý týraly usynys engizedi, - dep habarlaidy "Ult aqparat" kaz.tengrinews.kz portalyna silteme jasap.
"Men mynadai sheshim jasaimyn. Úkimet múshelerine qatysty tártiptik sharalardy el Prezidenti qabyldaityndyqtan, men búgin Memleket basshysynyń atyna energetika ministri Qanat Aldabergenuly Bozymbaevqa sógis jariialaý týraly usynys engizemin", - dedi Saǵyntaev úkimet otyrysynda.
"Vitse-ministrlerge kelsek. Bul meniń quzyrymda. Sondyqtan energetika vitse-ministri Áset Maǵaýovqa qatysty qyzmetinen bosatý týraly sheshim qabyldaimyn. Búgin keńse úkimettiń osyndai sheshimin daiyndasyn", - dedi premer-ministr.
Eske salaiyq, búgin ótken úkimet otyrysynda Saǵyntaev ministrden nelikten elde AI-92 benzini tapshy ekenin suraǵan edi. "Janar-jaǵarmai naryǵynda qalyptasqan jaǵdaiǵa nazar aýdaramyn. Óńirlerde defitsit baiqalyp otyr, benzin shekteýmen, al kei jerlerde tipti talonmen satylýda. Saldarynan baǵa ósip ketti. Alaida, Qanat Aldabergenuly (Bozymbaev - Avt.), úkimettiń ótken otyrysynda barlyq problemany sheshýge ýáde bergensiz, biraq janar-jaǵarmai boiynsha jaǵdai sheshilmedi, iaǵni jaǵdai turaqtanbady. Bul qashanǵy jalǵasa bermek?", - dedi Saǵyntaev úkimet otyrysynda.
Qanat Bozymbaev 2017 jylǵy 1 maýsymdaǵy jaǵdai boiynsha AI-92 qory 292 myń tonna bolǵanyn, al qordaǵy benzindi tutyný kezeńinen keiin munai bazalarynda bul kórsetkish 140 myń tonnaǵa azaiǵanyn, munyń tutynýǵa 15 kúnge jetetinin aitty. "Ortasha baǵa 11 paiyzǵa ósti. Al import úlesi shildedegi 15 paiyzdan qyrkúiektegi 30 paiyzdan, qazandaǵy 40 paiyzǵa deiin ósti. Bul jerde defitsit sózin qoldaný durys emes, elde defitsit joq", - dedi ministr.
"Sózińiz aýzyńyzda, elde defitsit bolmasa, kezek qaidan shyǵyp otyr? Halyq túsinbeidi ǵoi", - dedi premer-ministr.
