Búgin QR Premer-ministri Baqytjan Saǵyntaev jyl sońyna deiin bilim berý mekemelerin kompiýtermen jáne internetpen tolyq qamtamasyz etýdi tapsyrdy, dep habarlaidy Baq.kz tilshisi.
«Elbasy biylǵy jylǵy Joldaýynda Úkimetke tsifrlyq bilim berý resýrstaryn ári qarai damytý týraly tapsyrma bergen bolatyn. Osy baǵytta qabyldanǵan «Tsifrlyq Qazaqstan» baǵdarlamasy sheńberinde Bilim jáne ǵylym ministri kóptegen sharýa atqaryp jatyr. Degenmen, bizdiń tarapymyzdan, ásirese jergilikti basshylardyń tarapynan suranysqa ie bolyp turǵan negizgi másele - bilim berý mekemelerin kompiýtermen qamtamasyz etý. Bilim ministriniń baiandamasynda kórsetilgendei, Qazaqstan boiynsha birde-bir oblys 100 paiyz kompiýtermen qamtamasyz etilmegen. Almaty men Astana qalalarynda da. Aqmola oblysy - 29 paiyz, Jambyl oblysy - 22 paiyz, Ońtústik Qazaqstan oblysy - 38 paiyz, Qyzylorda oblysy - 40 paiyz, eń joǵary kórsetkish 82 paiyz - Atyraý oblysynda. Jyl sońyna deiin bul sharýa sheshimin tabady dep oilaimyn», - dedi Saǵyntaev.
Úkimet otyrysynda premer-ministr keń jolaqty internetpen qamtý máselesin de qozǵady. Úkimet basshysynyń aitýynsha, oblys ortalyqtary, qalalar men aýdan ortalyqtarynda búgin qol jetkizilip otyrǵan múmkindik - 85 paiyz. Qalǵan 15 paiyz 2020 jyldyń sońyna deiin sheshiledi.
«Wi-Fi júiesine kelsek, onda da túsiniksiz jaǵdailar bar. Negizi qalalarda bul suraqtyń bárin sheshýge bolady. Astananyń 54 paiyzy ǵana Wi-Fi-men qamtamasyz etilgen. Almaty oblysynda - 22, Aqmola oblysynda - 18 paiyz. Bul ońai sheshiletin suraqtar. Buny ákimder qolǵa alý kerek dep oilaimyn. Qalalyq mektepterdiń bári keń jolaqty internetpen jáne Wi-Fi-men qamtamasyz etiletin bolsa, bizdiń negizgi suraqtyń barlyǵy jyl sońyna deiin sheshiledi. Qurmetti áriptester, osyǵan asa úlken kóńil bólýlerińizdi suraimyn», - dedi Baqytjan Saǵyntaev.
