EAEO aiasynda kedergiler men shekteýlerdi joiýǵa baǵyttalǵan Jol kartasy ázirlenedi. Búgin Bishkekte QR Premer-Ministri Baqytjan Saǵyntaev Eýraziialyq úkimetaralyq keńestiń keńeitilgen quramdaǵy otyrysynda sóilegen sózinde osylai málim etti, dep habarlaidy "Ult aqparat" pm.kz saityna silteme jasap.
Sóz barysynda Qazaqstan Úkimetiniń basshysy Eýraziialyq ekonomikalyq odaqtyń eki jyldan astam ýaqytta tiimdi integratsiialyq birlestik retinde ornyqqanyn atap ótti.
«Degenmen bul jyldar bizdiń elderimiz úshin ońai bolǵan joq. Syrtqy qozǵaýshy kúshterdiń yqpaly, jahandyq qarjylyq jáne taýar naryqtarynyń turaqsyzdyǵy baiqaldy. Osyǵan orai, Odaqtyń JIÓ kólemi 0,7%-ǵa tómendedi. Bizdiń ózara saýda ainalymymyz 11%-ǵa azaidy. Osyndai kezeńde ózara is-qimyldy nyǵaitý, elder arasyndaǵy saýdany damytýdyń jańa tiimdi quraldaryn qalyptystyrý boiynsha ortaq kúsh-jigerdi shoǵyrlandyrý mańyzdy», - dep atap ótti B. Saǵyntaev.
Úkimet basshysynyń aitýynsha, bul baǵyttaǵy mańyzdy másele kedergiler men shekteýlerdi joiý bolyp tabylady.
«Bul jumysty júieli ári kezeń-kezeńimen júrgizgen jón. Atalǵan baǵytta memleketterdiń sarapshylary men komissiia edáýir jumystar atqardy. 60-tan astam kedergiler men shekteýlerdiń tizilimi úilestirildi. Aldaǵy ýaqytta olardy joiýǵa bailanysty Jol kartalary ázirlenetin bolady. Bul bizdiń kásiporyndarymyzǵa ortaq naryqtarǵa shyǵý jolyn jeńildetip, sonymen qatar olardyń damýyna qosymsha jaǵdailar jasaidy», - dedi Qazaqstan Úkimetiniń basshysy.
