Premer-ministr Baqytjan Saǵyntaev birinshi orynbasary men ishki ister ministrine sý tasqyny kezeńinde óńirlerdi jaǵdaidy qatań baqylaýda ustaýdy tapsyrdy, dep habarlaidy "Ult aqparat" Sputnik Qazaqstan agenttigine silteme jasap.
Úkimet basshysy jyl saiyn sý tasqynynyń saldaryn joiýǵa qazynadan milliardtaǵan qarjy bólý aqshany tiimsiz jumsaý ekenin aitty. Onyń ornyna durys baǵdarlama qabyldap, apattyń aldyn alǵan jón.
"Ótken jyly sý tasqynynyń saldarymen kúresý úshin jyl saiyn milliardtaǵan qarjy bólýdiń ornyna durys baǵdarlama qabyldaý kerektigin aittyq. Máselen byltyr biz rezervten 5,8 milliard teńge bóldik. Aqmola oblysynyń ákimi maǵan tutas shaǵyn aýdan salý úshin 2-3 milliard jeter edi deidi. Biyl eki milliardtan astam Qyzylorda surap otyr. Kóp uzamai taǵy bir oblys aqsha suraýy múmkin, Qudai saqtasyn, árine. Bul aqshany tiimsiz jumsaý dep sanaimyn. Onyń ornyna bógetter, basqa da gidrotehnikalyq qurylystardyń sapasyn tekserip, durys qaraý kerek. Oblys ákimderine úlken jaýapkershilik júktelip otyr. Jańa birde-bir ákim ishki ister ministriniń aitqanyna qulaq aspady. Ol (ministr –red. eskert) óz baiandamasynda jumys kemshin júrgizilip jatqan oblystardy atady. Al degenmen barlyq ákim óńirlerde jumys jaqsy júrip jatanyn baiandady. Jaqsy bolsa áńgime joq, biraq nege kóp dúnie osy kezge deiin jasalyp bitpegen? Sondyqtan Qulmuhanbet Nurmuhanbetuly (ishki ister ministri –red.eskert) Asqar Uzaqbaiulymen (premerdiń birinshi orynbasary –red. eskert) birge jaǵdaidy únemi baqylaýda ustańdar. Iesiz gidrotehnikalyq jáne basqa da qurylystar baqylaýǵa alynsyn. Ótken jyldaǵydai bolmasyn, kinálini izdep, eń aqyry durys aqpar bermedi dep bar kináni Qazgidrometke arta saldy. Al sondaǵysy ózderi beiqam júrdi, buǵan eshkim nazar aýdarmady, jaýapkershilikti de moinyna almady. Sondyqtan bul baǵytta jumysty jalǵastyramyz", — dep tapsyrdy Saǵyntaev úkimettiń kezekti otyrysynda.
Premer-ministr prezidenttiń tapsyrmasyna sáikes jańa sý qoimalaryn salý máselesin jaqyn arada jeke qarastyrý qajet.
"Baiandamalarda aityp ótkendei, byltyr qabyldanǵan jol kartasyna bailanysty birshama jumys atqarylǵan. Kólemi aýqymdy, degenmen de atqarylatyn jumys jeterlik. Búgin aitylǵandai, aldyn ala qaýip-qaterden saqtanyp qana qoimai, Elbasynyń tapsyrmasyna sáikes jańa sý qoimalaryn salý kerek. Bul másele jeke qaralýy tiis. Aqmola, Jambyl, Soltústik Qazaqstan oblysyna bailanysty berilgen tapsyrmalardyń atqarylýyn qarap shyǵýymyz kerek. Kúrdeli máselelerdiń bári sheshimin tabýy tiis. Qazaqta "sý – tilsiz jaý" degen sóz bar. Kóp sharýa jasalyp jatyr, desek te bir kúnde sýdyń qaidan kelgenin bilmei qalamyz. Jaibaraqat otyrýǵa bolmaidy, qatań baqylaýǵa alý kerek", — dep qorytty ol.
