Baqytjan Saǵyntaev «Almaty» telearnasyndaǵy Akimat Live baǵdarlamasynda qala qurylysyn retteitin jańa erejeler ázirlenetinin málim etti, dep habarlady QazAqparat.
Onyń aitýynsha, erejelerdiń basty maqsaty — qoǵam men biznes múddelerin eskeretin júieli sheshim qabyldaý.
Erejede jer ýchaskelerin igerý, onyń ishinde buǵan deiin alynǵan oń sheshimder men ruqsat qujattardy durys paidalaný qarastyrylǵan.
Erejeniń negizgi tarmaqtary qalany damytýǵa arnalǵan qala qurylysy talaptaryn bekitýge baǵyttalatyn bolady.
Sonymen qatar, tarihi qalyptasqan ǵimarattardy saqtaý jáne osy aimaqtarda qurylysty retke keltirý (aimaqtandyrý) maqsatynda erekshe qala qurylysyn aimaǵy belgilenedi.
Munda tarihi ortalyqtyń shekaralaryn anyqtaý mańyzdy. Sondai-aq, qalanyń basqa aýdandaryndaǵy jekelegen aimaqtar da erejede qarastyrylǵan.
«Qala qurylysyn erekshe retteý aimaqtarynda ǵimarattardyń tyǵyzdyǵy men biiktigi eskeriletin bolady. Mysaly, jańa ǵimarattyń biiktigi irgeles salynǵan nysannan 1/3 biik bolmaýy tiis. Budan ózge, erejelerde aeratsiia rejimin jaqsartý, kógaldandyrý, qalalyq ortany saqtaý men jailylyǵyn arttyrý talaptary jazylady. Tarihi kelbetti saqtaý úshin ǵimarattar men qurylystardyń qasbetterine qoiylatyn talaptar da eskeriledi. Qala turǵyndaryn, qoǵam belsendiler men sarapshylardy keńinen tarta otyryp, qoǵamdyq talqylaý ótkizý tetikterin ázirleý mańyzdy», - dedi ákim.
Júrgizilgen saraptama jáne turǵyndardyń pikirin jinaqtaý barysynda tarihi ortalyq aýmaǵynda 36 jer teliminiń jeke menshikte ekeni anyqtaldy.
Bul ýchaskeler eki topqa bólindi: qurylys bastalǵan jáne bos jatqan jerler. 14 ýchaskede qurylys bastalǵan, onyń ishinde 3 nysannyń qurylysy toqtady ári ruqsat qujattary qaitaryldy.
Turǵyndardyń ótinishi boiynsha 11 nysanǵa usynym berildi, munda qozǵalys syzbasyn uiymdastyrý, abattandyrý, qabattar sany jáne taǵy basqa máseleler eskeriletin bolady.
«Bos jatqan jer telimderi boiynsha, onyń ishinde 8 ýchaskeni qaitarý (satyp alý) qarastyrylýda, munda abattandyrylǵan jáne kógaldandyrylǵan qoǵamdyq keńistikter qurylatyn bolady. 14 ýchaskege jasyl jelekterdi kesýge tyiym salý, burynnan bar nysandardy eskere otyryp, qabattar sanyn jáne fýnktsionaldy paidalanýdy azaitý boiynsha qala qurylysyn júrgizýge shekteý qoiyldy», - dep atap ótti qala basshysy.
