Almaty qalasynyń ákimi Baqytjan Saǵyntaev shahardyń 2050 jylǵa deiingi Damý strategiiasy týraly aitty, dep habarlaidy QazAqparat.
B. Saǵyntaev qalanyń Damý strategiiasy jóninde ál-Farabi atyndaǵy Qazaq ulttyq ýniversitetiniń stýdentterimen kezdesý barysynda málim etti.
«Búginde Elbasynyń tapsyrmasyna sáikes, qalanyń uzaqmerzimdi Damý strategiiasynyń jobasyn jasadyq. Bul qujatty «Almaty-2050» dep atadyq. Men sizdermen qalamyzdyń damýy týraly ózimniń kózqarasymmen bóliskim keledi. Sizderdiń de bul jobaǵa qatysyp, qoldaityndaryńyzǵa senemin», - dedi ol jinalǵandarǵa.
Ákimniń aitýynsha, birinshi strategiialyq basymdyq – ǵalamdyq «aqyldy» qala bolý. Sarapshylardyń boljaýynsha, 2030 jylǵa qarai megapolis turǵyndarynyń sany 5 millionǵa jetedi.
«5 million – bul Úlken Almaty. Úlken Almaty – bul Almaty qalasy jáne qalamańy, iaǵni almatylyq aglomeratsiia. Janymyzda Almaty oblysynyń 5 aýdany ornalasqan. Onda oblys halqynyń 60% turady. Olar Taldyqorǵanǵa barmaidy. Sebebi, bul óte alys, barlyǵy bizdiń shaharǵa keledi. Qazir Almatyda 3 million adam turady, 2030 jylǵa qarai 5 millionǵa jetedi. Sondyqtan halyqtyń ósýine bailanysty infraqurylymǵa júkteme barlyq damýshy qalalar úshin ǵalamdyq mindet bolyp tabylady. Olardyń qatarynda bizde barmyz. Bizge de, basqa álemdik megapolister siiaqty, ýrbanizatsiia daǵdarysy tónip tur. Kóship kelýshiler sany jyl saiyn artyp keledi. Bul, qalanyń barlyq áleýmettik, injenerlik, kólik infraqurylymyn qaita júkteý qajettigine alyp keledi», - dedi ákim.
Sondyqtan, Úlken Almatynyń bútin aglomeratsiiasy aýqymyndaǵy sheshimder úshin proaktivti josparlaý jáne jobalaý, smart-tásilder qajet», - dedi Baqytjan Saǵyntaev.
«Aglomeratsiiany esepke almaǵanda, qala halyqynyń sany 3-3,5 million adam. 2030 jyldan keiin ony osy deńgeide ustap turý úshin qala mańyn damytýymyz kerek. Ol jerde jumys oryndaryn ashyp, áleýmettik infraqurylymdy qurýymyz qajet. Sondai-aq, sol jerlerge qoǵamdyq kólikterdi tartýymyz kerek. LRT, BRT elektr poiyzyn iske qosýymyz tiis», - dedi ákim.
