«Almaty» telearnasyndaǵy Akimat Live baǵdarlamasynyń tikelei efirinde qala ákimi Baqytjan Saǵyntaev qazirgi epidemiologiialyq ahýal týraly aityp, almatylyqtarǵa úndeý joldady, dep habarlaidy "Ult aqparat".
«Epidahýaldyń qanshalyqty kúrdeli ekenin týǵan-týystan, aǵaiynnan, jora-joldastan bilip otyrsyz. Aralarynda aýyryp qalyp jatqandar bar. Tipti, qaitys bolǵandar da bar. Bul degenimiz – áli kúnge deiin epidahýaldyń óte kúrdeli ekenin túsinbegenimizde nemese túsingimiz kelmeitininde. Jeńil dert dep oilaimyz. Bir jarym jyl boldy indetpen arpalysyp kelemiz. Eger siz oilaǵandai jeńil bolatyn bolsa, baiaǵyda ótip keter edik. Onyń bir sheshimi joq. Ár shtamm paida bolǵan saiyn kúrdelenip barady. Qazir, mine, deltany kórip otyrmyz. Óte qiyn jaǵdaiǵa alyp keldi. Ony naýqastardyń sanynan-aq kórýge bolady. Bizdiń klinikalarǵa kún saiyn 700-750 naýqas túsedi. Turǵyndardan vaktsina alýǵa úndep jatyrmyz. Vaktsinatsiianyń ózine qarsy qansha áńgime aityldy. Vaktsina kerek degenge senbeimiz, kerek emes degenge kóbirek senemiz. Vaktsinasyz sheshim joq, osyny jaqsy túsiný kerek», – dedi ákim.
Sonymen qatar, qala ákimi shahardaǵy karantin talabyn saqtamaityn túngi mekemelerdiń aldyna politsiia patrýli qoiylǵanyn tilge tiek etti.
«Báribir qoǵamdyq oryndarda kóp júremiz. Kásipkerlerdiń eshqaisysy karantin talabyn saqtamaidy, ásirese, meiramhanalar men túngi klýbtar. Biz qaladaǵy 74 mekemeniń aldyna politsiia patrýlin qoiǵa májbúr boldyq. Olardyń óz jumysy bar, olar qalanyń qaýipsizdigin qamtamasyz etý kerek emes pe? Olar kerisinshe túngi mekemelerge jastar jinalmasyn dep kúzetip tur. Sizderden taǵy da suraimyn. Jaýapkershilikpen qaraýyńyzdy suraimyn. Bulai jalǵasa berse, budan da qatań sharalar qabyldaimyz. Monitoring toptar aralaidy, qadaǵalaidy. Biraq búkil qalany jaýyp tastai almaidy. Óte aýyr jaǵdaida turmyz. Dárigerler kúndiz-túni jumys istep jatyr. Bulai jalǵasa berse, oryndy qaidan tabamyz? Qazir oryn jetkilikti. Degenmen saqtyq sharalaryna bei-jai qaramaý kerek», – dedi qala ákimi.
