Almaty ákimi Baqytjan Saǵyntaev Tóle bi kóshesinde 13 aǵashtyń zańsyz kesilýine qatysty oqiǵany óz baqylaýyna aldy.
Ákim bul týraly áleýmettik jelidegi jeke paraqshasynda jazdy.
«Bul óreskel oqiǵa Prezident pen qoǵamnyń narazylyǵyn týdyrdy. Qala ákimdigi aǵash kesýge ruqsat bergen joq. Qorshaǵan ortaǵa keltirilgen zalaldyń mólsheri esepteledi.
Mamandandyrylǵan tabiǵatty qorǵaý prokýratýrasy zańsyz aǵash keskeni úshin QR QK 340-baby boiynsha sotqa deiingi tergeý isin bastady. Is Almaly aýdanyna qarasty politsiia basqarmasynyń qaraýyna berildi. Almaty PD bastyǵy Q.Taimerdenovke isti tolyǵymen qarap, onyń obektivtiligin qamtamasyz etý, kinálilerdi anyqtaý jáne jaýapkershilikke tartý tapsyryldy.
Qazirgi ýaqytta saýda úiiniń janyndaǵy aýmaqty «Arena S» JShS-ǵa qarasty (Sulpak) JK «Sakýra» men «Býribekova» merdigerleriniń abattandyrǵany anyqtaldy. «Sakýra» JK-nyń basshysy QR ÁQBtK 437 baby boiynsha túngi ýaqytta azamattardyń tynyshtyǵyn buzǵany úshin ákimshilik jaýapkershilikke tartyldy.
Istiń barysy týraly jurtshylyqty habardar etip otyramyz. Bul másele meniń jeke baqylaýymda», - dedi Almaty ákimi.
Eske sala ketsek, 23 qarashaǵa qaraǵan túni Almatyda saýda úiiniń janynda (Áýezov-Tóle bi kósheleriniń qiylysy) jaiqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi. «Qazir aýdan ákimdigi men Politsiia departamenti kesilgen aǵashtardyń tuqymy men sapasyn anyqtaý úshin oqiǵa ornynda jumys istep jatyr. Aiypty tulǵalar anyqtalǵan soń Politsiia departamenti olardy jaýapkershilikke tartady. Tolyǵyraq aqparatty anyqtaý jumystary aiaqtalǵan soń jariialaimyz», - dep málim etken bolatyn qala ákimdiginen.
Keiin Almaty qalalyq Jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady.
Bul jaǵdaiǵa Prezident Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizip, kinálilerdi jaýapkershilikke tartýdy tapsyrdy.
