Almaty ákimi Baqytjan Saǵyntaev «Jumyspen qamtýdyń jol kartasy» baǵdarlamasy jáne «Biýdjetke qatysý» jobasy aiasynda qolǵa alynǵan Almaly aýdanynyń koǵamdyq keńistikterin abattandyrý barysymen tanysty, dep habarlaidy "Ult aqparat".
Atap aitqanda, ákim Jambyl atyndaǵy skver, Jambyl kóshesi boiyndaǵy jáne Rozybakiev kóshesi men Qojamqulov kóshesiniń qiylysyndaǵy «jasyl» aimaqtarda boldy. Munda jaily oryndyqtar, trenajer keshenderi qoiylyp, oiyn alańdary, gúlzarlar jasalýda. Jaiaý júrginshi joldary abattandyrylyp jatyr.
Almaty ákimi «Tastaq» yqshamaýdanyndaǵy Prokofev kóshesin jóndeý jumysynyń barysymen tanysty. Munda oiyn jáne sport alańdary, demalatyn oryndary bar zamanaýi jaiaý júrginshi aimaǵy salynady. Prokofev kóshesi Dúisenov kóshesimen qilysady, munda da ótken jyly jaily jaiaý júrginshi aimaǵy paida bolǵan edi.
«Osylaisha, Almaly aýdanynyń osy bóligindegi turǵyndardyń óz «Tólebaiy» paida bolady», - dep jazdy qala ákimi Instagram-paraqshasynda.
B. Saǵyntaev jumys sapary kezinde «Jumyspen qamtýdyń jol kartasy» baǵdarlamasy aiasynda qolǵa alynǵan Gagarin býlvarynyń Abai dańǵylynan Tóle bi kóshesine deiingi aýmaǵynyń jáne Maqataev atyndaǵy skverdiń qalai jóndelip jatqanyn kórdi.
«Bul skver shyǵarmashylyq ókilderi, ziialy qaýymnyń, jas aqyndar men jazýshylardyń mekenine ainalýy tiis. Tipti mundaǵy atmosferanyń ózi shyǵarmashylyqqa shabyttandyratyndai jaǵdai jasaýdy mindettedim», - dedi B. Saǵyntaev.
Biyl Almaly aýdanynda «Biýdjetke qatysý» jobasy boiynsha 15 joba iske asatyn bolady. Ol úshin 240 mln teńge bólingen. Aita keterligi, skverler men jasyl aimaqtardy, aýlalardy jóndeý, múmkindigi shekteýli azamattar úshin jerasty ótpe joldaryna kótergish mehanizmderdi ornatý boiynsha birqatar jobalar da júzege asady.
