Almaty ákimi Baqytjan Saǵyntaev Zerdeli shaǵyn aýdanyndaǵy jeti ýchaskeni memleket menshigine qaitarý qarastyrylyp jatqanyn aitty, dep habarlaidy "Ult aqparat".
Bul týraly ol shaǵyn aýdan turǵyndarymen kezdesýde aitty.
«Zerdeli» yqshamaýdanynyń turǵyndarymen áńgime barysynda qala ákimi kóterilgen máselelerdiń nazardan tys qalmaitynyn atap ótti. Sonyń biri — «kiristirý» dep atalatyn josparlanǵan qurylys, iaǵni turǵyn úilerge irgeles jatqan ýchaskelerde qurylys júrgizý.
Yqshamaýdannyń belsendi turǵyndarynyń biri Dana Rahimova turǵyndardyń «kiristirý» qurylystarynan qaýiptenetinin aitty. Onyń bul sózine ákim óziniń tapsyrmasy boiynsha Jer qatynastary basqarmasynyń osyndai jeti ýchaskeni memleket menshigine qaitarý máselesin qarap jatqanyn jetkizdi.
«Bul ýchaskeler irgeles salynǵan úiler turǵyndarynyń tilekterine sai abattandyrylýy tiis. Múmkin munda oiyn, sport nemese balalar alańdary qajet shyǵar», - dedi B. Saǵyntaev.
Áńgime barysynda Almaty ákimi Alataý aýdanyn damytýǵa erekshe nazar aýdarylatynyn, onyń ortalyqtandyrý qaǵidaty boiynsha júzege asyrylatynyn aitty.
Sonymen qatar, Almaty ákimi Alataý aýdanyndaǵy «Baqytty otbasy» áleýmettik qoldaý ortalyǵynyń bazasynda júzege asyrylǵan «Isker ana» jobasyna qatysýshy kópbalaly analarmen kezdesý barysynda isker áielderdiń jetistikterine qyzyǵýshylyq bildirdi.
Alataý aýdanyndaǵy «Baqytty otbasy» ortalyǵynyń jetekshisi Aqmaral Basirova biyl 25 myńǵa jýyq áieldiń túrli sheberlik kýrstarynda bilim alǵandaryn aitty. Qazirdiń ózinde olardyń kópshiligi tabysty isker áielge ainaldy.
«Kúrdeli jaǵdailarǵa tap bolǵan kóptegen áielderdiń ómiri bizdiń kóz aldymyzda ózgerýde. Qiyndyqtarǵa qaramastan, olar óz kúshterine senedi ári jańa isterdi igerýge ýaqyt ta tabady», - dedi Aqmaral Basirova.
Qala ákimi B. Saǵyntaev «Isker ana» baǵdarlamasynyń kópbalaly analardy qoldaýǵa baǵyttalǵanyn eske saldy. Olar «Baqytty otbasy» aýdandyq ortalyqtarynyń bazasynda «Eńbek» memlekettik baǵdarlamasy aiasynda kásipkerlik negizderin oqyp-úirenedi. Kópbalaly otbasylardan shyqqan 888 adam 555 myń teńgege deiin grant aldy. Olardyń 557-si ózderiniń jeke kásipterin ashty. Taǵy 203 kópbalaly ana 5 million teńgege deiin grant aldy. Osy jobaǵa jalpy somasy 406 mln teńge jumsaldy.
Almaty ákimi B. Saǵyntaevtyń aitýynsha, biyl granttardyń jalpy somasy 200% -ǵa ulǵaiyp, 700 mln teńge boldy.
«Baǵdarlama suranysqa ie jáne naqty nátijelerdi kórsetýde. Sizdermen kezdeskennen keiin men buǵan taǵy da kóz jetkizdim. Ákimdik kópbalaly analar arasynda kásipkerlikti damytýǵa qoldaý kórsetýdi jalǵastyrady. Jeńildetilgen jalǵa beriletin úi-jailardy, mysaly, shaǵyn óndiristik parkterde oryndardy alýǵa kómektesemiz. Bulardan ózge, granttarǵa bólinetin somany ulǵaitý múmkindigin qarastyramyz», - dedi B. Saǵyntaev.
