Búgin Úkimettiń selektorlyq rejimdegi otyrysynda QR Úkimet basshysy Baqytjan Saǵyntaev Elbasynyń "Bes áleýmettik bastamasyn" tyńǵylyqty júzege asyrýǵa baǵyttalǵan birqatar tapsyrma berdi.
"Elbasynyń "Bes áleýmettik bastamasy" - aýqymdy baǵdarlama. Sondyqtan biz árbir bastamany sapaly júzege asyrýǵa mindettimiz. Baiandamadan kórip otyrǵanymyzdai, jalpy barlyq baǵyttar boiynsha jumystar oryndalyp jatyr. Birinshi bastama (halyqty qoljetimdi baspanamen qamtý) boiynsha jumysty jalǵastyrý qajet. Asqar Uzaqbaiuly (Úkimet basshysynyń birinshi orynbasary Asqar Mamin) Daniiar Talǵatulynyń (Ulttyq bank tóraǵasy Daniiar Aqyshev) tarapynan aitylǵan usynystardy osy aptanyń sońyna deiin qarap, juma kúni sheshimin shyǵarý kerek. Shyn máninde biraz kedergi bar. Onyń bárin joiyp, baǵdarlamanyń júrýin jyldamdatýymyz qajet", - dedi Úkimet basshysy.
Premer-Ministrdiń aitýynsha, «Jalaqysy tómen jumysshylardyń eńbekaqysyn kóbeitý úshin olardyń salyq júktemesin azaitý» atty ekinshi bastama oryndaldy. 20 myń bilim grantyn bólýdi kózdeitin úshinshi bastamanyń birinshi bóligi jumysyn aiaqtady. Ekinshi bóligi stýdentterdi jataqhanamen qamtýdy kózdeidi.
"Erlan Kenjeǵaliuly (Bilim jáne ǵylym ministri Saǵadiev), ákimshiliktermen birlese otyryp, búgingi aitylǵan usynystardyń barlyǵyn taǵy bir pysyqtap alý qajet. Eger biyl 5 myń jataqhana orny tapsyrylýy kerek bolsa, onda sonyń barlyǵyn oryndaýymyz qajet", - dedi Baqytjan Saǵyntaev.
Úkimet basshysynyń sózine qaraǵanda, halyqtyń tabysynyń artýyn qamtamasyz etý úshin ózin-ózi jumyspen qamtyǵan jáne jumyssyz halyqqa mikronesie berýdi kózdeitin tórtinshi bastama boiynsha negizinen indikatorlyq kórsetkishterge qol jetkizildi. Biraq talap etilgen sapasy óte tómen. Bul rette Eńbek jáne halyqty áleýmettik qorǵaý ministrligi tarapynan júrgizilgen jumystar durys úilestirilmegen Mikronesieler 4 óńirden basqa oblystarda 100 paiyzdan tómen igerilgen.
"Besinshi bastama ýaqytynda salynyp, iske qosylýyn qamtamasyz etýimiz qajet. Qanat Aldabergenuly jumys júrgizilip jatyr, Baqylaýyńyzda bolsyn", - dedi Premer-Ministr "Saryarqa" magistraldy gaz qubyrynyń qurylysyna jaýapty Energetika ministri Bozymbaevqa qarata.
