Qyrǵyzstandaǵy sailaý naýqany baýyrlas eki eldiń arasyna jik túsirmeýi kerek. Bul týraly búgin Úkimettiń selektorlyq rejimdegi otyrysynda QR Premer-Ministri Baqytjan Saǵyntaev aitty, dep habarlaidy "Ult aqparat".
Úkimet basshysy keshe Qyrǵyzstan Prezidenti Almazbek Atambaevtyń sailaýaldy maqsatta jasaǵan jaýapsyz, arandatýshylyq mándi jáne kópe-kórineý jalǵan paiymyna qatysty málimdeme jasaǵandyǵyn, onda Qazaqstannyń Táýelsizdik jyldary ishindegi jetistikterin naqty dálel-dáiektermen keltirgendigin basa aitty.
«Bizdiń ata-babalarymyz «qazaq pen qyrǵyz bir týǵan dep, eki halyqtyń dostyǵyna erekshe mán bergen. Sailaý naýqany ótedi, ketedi. Alaida ol baýyrlas eki eldiń arasyna jik túsirmeýi kerek. Bizdiń Elbasymyzdyń ustanǵan saiasaty da osy - eldiń, týysqan halyqtardyń birligi. Erteń dosqa kúlki, dushpanǵa taba bolmaý úshin ǵasyrlardan jetken eki halyqtyń dostyǵyn, birligin saqtaiyq. Qaita ony saiasi, ekonomikalyq jaǵynan ári qarai nyǵaitý úshin bárimiz birlesip, bir jaǵadan bas, bir jeńnen qol shyǵaryp jumys isteýimiz kerek», - dedi Baqytjan Saǵyntaev.
