QR Bilim jáne ǵylym ministri Erlan Saǵadiev otstavkaǵa ketýin talap etken birqatar qoǵam qairatkerleriniń sózine jaýap berdi, dep xabarlaidy QazAqparat.
"Ol kisilerdiń mundai málimdemelerimen tanys emespin. Ondai sózder aitylǵan bolsa, men ózimniń jaýabymdy beretin de shyǵarmyn. Biraq olar mundai máseleni kótere alatyn adamdar qatarynan emes dep sanaimyn", - dedi ministr Úkimette ótken baspasóz máslixatynda.
Ministr sonymen qatar depýtat Bekbolat Tileýxannyń aqparat quraldary aldynda "jekpe-jek" ótkizý týraly usynysyna da pikir bildirdi.
"Bekbolat Tileýxan BAQ aldynda pikir jarystyrýdy usyndy. Menińshe, bul durys emes. Biz ony oqýlyq jónindegi komissiiaǵa shaqyrǵan edik. Búgin men Májiliske qońyraý shaldym. Onda 11 depýtat jazylǵan, solardyń qatarynda Bekbolat Tileýxan da bar. Sol komissiianyń jumysyna atsalyssyn, jumysyn kórsetsin. Men onymen baspasózde pikirtalasýǵa daiynmyn, biraq ol Úkimettiń jumysy emes", - dedi E. Saǵadiev.
Eske sala keteiik, tanymal qoǵam qairatkerleri Muhtar Taijan men Aidos Sarym QR Bilim jáne ǵylym ministri Erlan Saǵadievke ornyn bosatýdy usynǵan bolatyn. Olar elimizdiń bas pedagogy qazaq xalqyna jáne qazaq tiline qarsy shyqty dep aiyptaǵan bolatyn.
