Qazaqstan bilim jáne ǵylym ministri Erlan Saǵadiev Aqtóbe oblysyndaǵy qyzdary mektepke oramal tartyp baratyn ata-analardyń balalaryn mektepke jibermei, qashyqtan oqytý týraly usynysyna kommentarii berdi, dep habarlaidy "Azattyq".
Astanada úkimet otyrysynan keiin tilshige bergen jaýabynda Saǵadiev bul máseleni júieli túrde talqylaý qajetin aitty. «Biz oǵan múmkindik beremiz be, bermeimiz be - sony talqylap, ata-analarmen kelissek, bul máselege qatysty óz jobalarymyzdy daiyndaimyz» dedi.
Ministrdiń aitýynsha, oramal daýyn retteitindei jetkilikti normativtik qujat bar jáne ol «Aqtóbe men Astanada oramal daýyna qatysty bolǵan birneshe sot otyrysynda kórsetildi». Ol oramal daýyna qatysty ózderiniń zańdarǵa engizetin qujattary daiyn ekenin jáne ony májiliske túsiretinin aitty.
Erlan Saǵadiev oramal taǵatyn qyzdarǵa arnalǵan mektep salý týraly buǵan deiin aitylǵan usynysy «durys sheshim bolmaitynyn», mektepte sabaq memlekettik standart boiynsha sabaq ótkiziletinin aitty.
«Balalar qandai mektepke barsa da bir standartpen oqidy» dedi Erlan Saǵadiev.
Buǵan deiin Aqtóbe oblysynda birneshe ata-ana oramal tartatyn qyzdaryn mektepke kirgizbei qoiǵannan keiin Resei mektepterine aqyly túrde qashyqtan oqytýǵa uiǵarǵanyn aitqan.
Aqtóbe oblystyq din isteri departamenti buǵan deiin oqý jylynyń úshinshi toqsany bastalǵaly oblysta oramal tartatyn kem degende 210 qyz bala mektepke bara almai otyrǵanyn habarlaǵan edi. Departamenttiń sońǵy dereginshe, qazir bul san 173-ke deiin azaiǵan.
Aqtóbe oblysynyń bilim salasyndaǵy baqylaý departamenti buǵan deiin Aqtóbe oblysynda «oramal daýyna» orai balalary mektepke barmai otyrǵan on ata-ananyń árqaisyna 12025 teńgeden aiyppul salynǵanyn, al taǵy eki ata-anaǵa aiyppul salý úshin qujattary ázirlenip jatqanyn habarlaǵan.
