Bilim jáne ǵylym ministri Erlan Saǵadiev muǵalimderdiń jalaqysyn ósirý qalai júzege asyrylatynyn aitty, dep habarlaidy Sputnik Qazaqstan tilshisi.
Májiliste ótken úkimet saǵatynda depýtat Shavhat Ótemisov ministrden muǵalimderdiń jalaqysy qalai jáne qashan ósetinin surady.
"Memleket basshysy biylǵy jylǵy joldaýynda bilim berýdiń jańartylǵan mazmunyna kóshetin muǵalimderdiń laýazymdyq jalaqysyn 2018 jyldyń 1 qańtarynan bastap 30 paiyzǵa kóbeitýdi tapsyrdy. Sonymen birge, kelesi tapsyrmasy 2018 jyly muǵalimder úshin biliktilik deńgeiin eskeretin kategoriialardyń jańa kestesin engizý edi. Endi muǵalimderdiń jalaqysy biliktilik testerin tapsyrýyna bailanysty 30-dan 50 paiyzǵa deiin ósetin bolady. Sailaýshylarmen kezdesken kezde osy másele pedagogikalyq qoǵamdastyqtyń erekshe qyzyǵýshylyǵyn týǵyzdy. Osyǵan bailanysty keibir anyqtaǵym kelgen máseleler bar. Birinshiden, muǵalimderdiń qandai sanatyna ústemeaqy kózdeledi jáne ol nege bailanysty bolady? Mysaly, jumys ótiline me, onyń kásibi jetistikterine me, qalalyq ne aýyldyq mektep degenge bailanysty bola ma? Muǵalimge eńbekaqysyn ósirý úshin ne isteý kerek? Óitkeni olardyń barlyǵy jańartylǵan bilim mazmunymen jumys istemeidi ǵoi. Jáne ústemeaqy naqty qandai kezeńnen bastap júzege asyrylatynyn túsindirip berseńiz", — dedi depýtat.
Suraqtyń mańyzdylyǵyn atap ótken Erlan Saǵadiev Elbasyna taǵy bir ret rahmetin aitty.
"Biz jańa oqý jylynan bastap muǵalimderdi biryńǵai testileýden ótkizýdi josparlap otyrmyz. Tek qana biryńǵai testileý júiesin engizemiz, al burynǵy júie sol kúiinde qalady. Biryńǵai testileý nege kerek? Qazir bárimizge keregi – muǵalim óziniń sabaǵyn bile me, bilmei me? Sony bilý úshin, muǵalimder daiyndalý úshin biryńǵai testileý rejimin engizip otyrmyz", — dedi Saǵadiev.
Emtihanda muǵalimder 100 suraqqa jaýap beredi, onyń 70 suraǵy pán boiynsha bolady.
"Al 30 suraq bilim berý ádistemeleri jáne zańdar siiaqty suraqtarǵa arnalǵan. Qazirgi ýaqytta suraqtar daiyn, birneshe qabyldaityn qujattar bar. Onyń bárin eki-úsh aidyń ishinde daiyndasaq, jańa oqý jylynan muǵalimderdi testileýden ótkizip, ári qarai deńgeiin kóterýge mehanizm engizemiz. Bul kóp memlekette bar júie ", — dedi ministr.
"Muǵalimderdiń bári testileýden ótýi kerek pe?", — dep surady májilis tóraǵasynyń orynbasary Gúlmira Isimbaeva.
"Biryńǵai testileýden biliktilik deńgeiin kóterýge múddeli muǵalimderdiń bári ótýi qajet. Biraq, mysaly, muǵalimder eki-úsh jyl buryn biliktilik deńgeiin kóterse, ári qarai jumys isteýge bolady. Kelesi kezeńde ǵana testileýden ótetin bolady", — dep jaýap berdi ministr.
Odan keiin vitse-spiker jalaqysyn kóbeitý úshin muǵalimderdiń 100 suraqtyń nesheýine jaýap berýi kerek ekenin surady.
"Bári deńgeige bólingen. Eń joǵary deńgeiine suraqtyń toqsan paiyzyna, pedagog-zertteýshi seksen paiyzyna, pedagog-sarapshy jetpis paiyzyna, pedagog-moderator alpys paiyzyna jaýap berýi kerek", — dedi Saǵadiev.
"Sonda sizderdiń oiyńyzsha, muǵalimniń bar kásibi deńgeiin osy 100 suraq anyqtap beredi dep otyrsyzdar ǵoi…", — dedi depýtat.
"Joq, olai emes. Eki kezeń bolady. Birinshi, ulttyq biryńǵai testileýden ótedi. Ekinshi, komissiia sheshetin bolady. Iaǵni, qazirgi júie qalady. Biz tek qana biryńǵai testileý nátijesin komissiiaǵa berip otyramyz. Jumys tobyna birneshe depýtat qatysqan bolatyn. Biz birneshe ai muǵalimdermen de, mektep direktorlarymen de talqyladyq. Qazirgi ýaqytta muǵalimder ony túsinip, daiyndalyp otyr", — dep túidi sózin ministr.
