Soltústik Qazaqstan oblysynda jerles jazýshy Safýan Shaimerdenovtiń ǵasyrlyq mereitoiyna orai birqatar is-shara ótti, al Amangeldi aýylyndaǵy týǵan úiine memorialdyq taqta qoiyldy, dep habarlaidy QazAqparat.
Safýan Shaimerdenovtiń 100 jyldyq mereitoiy Petropavlda «Sóz zergeri – Safýan» atty shyǵarmashylyq keshpen ashyldy. Oǵan jazýshynyń áriptesteri, belgili qalamgerler, qoǵam qairatkerleri, týǵan-týystary qatysyp, estelikterimen bólisti. Al negizgi is-shara ekinshi kúni Safýannyń kindik qany tamǵan Amangeldi aýylynda ótti. Aq shańqan kiiz úiler tigilip, ulan asyr toi uiymdastyryldy.
Meimandar jazýshynyń týyp-ósken úiinde bolyp, «Sháimerden áýletiniń qarashańyraǵy» dep jazylǵan memorialdyq taqtanyń ashylý rásimine qatysty.
«Bul qarashańyraqqa ákemiz tiri kezinde Sábit Muqanov, Ǵabit Músirepov te kelgen. Ózimen qatarlas júrgen Tahaýi Ahtanov, Ábdijámil Nurpeiisov sekildi qazaqtyń marǵasqalarynyń bári osy úide bolyp, qarashańyraqtan dám tatty. Sondyqtan bul úidi el kóship ketse de biz buzbai saqtap otyrmyz. Aýyl qaitadan ornyna keledi dep oilaimyn. Sebebi 150 jyldyǵy ótip jatqan Ahmet Baitursunovtyń aýyly eki ret jabylyp, eki ret qaitadan ornyna kelgen eken», - dedi Safýan Shaimerdenovtyń uly, belgili jýrnalist Saiyn Shaimerden.
Safýan Shaimerdenovtyń «Bolashaqqa jol» atty alǵashqy romany 1953 jyly jaryq kórdi. Bul týyndy keiin «Inesh» degen ataýmen orys tiline aýdaryldy. «Ómir nury» atty povester tsikline «Mezgil», «Qarǵash», «Ómir nury», «It ashýy», «Májnún tal» atty shyǵarmalary kirgen. Olar shetel tilderine áldeneshe ret aýdarylǵan.
Qalamgerdiń ózi de aýdarmamen ainalysty. R.Tagordyń «Kúireý» romanynyń aýdarmasy úshin 1984 jyly Qazaqstan Jazýshylar odaǵynyń syilyǵyn, «Aǵalardyń alaqany», «Ádebi tolqyndar» atty kitaptary úshin 1988 jyly respýblikanyń Abai atyndaǵy Memlekettik syilyqty aldy.
«Safýan Shaimerdenov bizdiń ulttyq ádebietimizdi biikke kótergen klassiigimiz ǵana emes, ol ultymyzdyń ar-uiatyna ainalǵan úlken azamat. Ol bizdiń qanshama urpaqqa úlgi bolatyn ónegeli is tyndyrǵan qairatker. Qazaq jazýshysy eger myqty bolatyn bolsa, kórkem ádebiet arqyly ultty tárbieleý mindetin ǵana emes, ol qairatkerlik mindetti de atqarady. Sol mindettiń biiginen tabylǵan aǵamyz keshegi jeltoqsanda jastardy arashalap, respýblikanyń eń biiginde turǵan kisilerdiń aldynda óziniń oi tujyrymdaryn aitty», - dedi QR Prezidentiniń keńesshisi, Ulttyq ǵylym akademiiasynyń akademigi Baýyrjan Omarov.
1992 jyly Safýan Shaimerdenov Halyq jazýshysy qurmetti ataǵyna ie boldy.
