Keshe ǵana Qyrǵyzstan premer-ministri bolyp taǵaiyndalǵan Sadyr Japarov 15 qazanda keshkisin jaqtastarynyń aldyna shyǵyp, "prezident Sooronbai Jeenbekov otstavkaǵa ketkenin" aityp, "barlyq bilik meniń qolyma ótti" dedi.
Bilik eks-depýtat Japarovty 2013 jyly Qumtór altyn kenishin memleket ieligine alý talabymen Qaraqol aýylynda miting uiymdastyryp, sol kezdegi Ystyqkól oblysynyń ákimin kepilge alǵan degen aiyppen 2017 jyly tamyzda sottap, 11,5 jylǵa túrmege qamaǵan edi. 6 qazanda elde parlament sailaýynyń nátijesine qarsy narazylyq kezinde Japarovtyń jaqtastary ony qamaýdan bosatyp aldy.
14 qazanda parlament Japarovty premer-ministr etip taǵaiyndaǵan. Japarov pen onyń jaqtastary Soroonbai Jeenbekovtiń prezidenttikten ketýin talap etken.
15 qazanda Jeenbekov prezidenttiń resmi saitynda málimdeme jariialap, otstavkaǵa ketkenin málimdedi. Osy kúni keshkisin Japarov Jeenbekovtiń otstavkasyn talap etip turǵan jaqtastarynyń aldyna shyǵyp taraýǵa shaqyrdy.
"Barlyǵy ornyna keldi. Burynǵy prezident Sooronbai Jeenbekov aryzyn jazyp berip ketti. Spiker Kanat Isaev onyń mindetin atqarý múmkin emes eken dep, aryzyn jazyp berdi. Búgin prezidenttiń mindetin atqarýshy jańa premer-ministr degen qyzmet maǵan ótti. Kóp raqmet. Úilerińizge qaitsańyzdar bolady" dedi ol.
Qyrǵyzstan Konstitýtsiiasy boiynsha, eger el prezidenti qyzmetinen merziminen buryn ketse, jańa prezident sailanǵansha onyń mindetin Jogorký keńesh tóraǵasy atqarady. Eger parlament spikeri prezident mindetin atqara almasa, bul mindet premer-ministrge kóshedi.
12 qazanda qyrǵyz parlamentiniń spikeri retinde bekitilgen Kanat Isaev 24kg saityna bergen pikirinde "parlamenttiń altynshy shaqyrylymynyń merzimi ótkendikten prezident mindetin atqarýshy qyzmetine kirisýge moraldyq quqyǵy joǵyn" aitqan. Isaev múshe "Qyrǵyzstan" partiiasy fraktsiiasynyń jetekshisi Nurbek Álimbekov Azattyqtyń Qyrǵyz qyzmetine Isaevtyń óz erkimen prezident mindetin atqarýdan bas tartqanyn jetkizdi. "Biraq Isaev Jogorký keńesh tóraǵasy bolyp qala beredi" dedi ol.
- Jeenbekov 15 qazanda jurt aldyna shyqqan joq. Ol – keiingi 15 jylda Qyrǵyzstanda bilikten ketýge májbúr bolǵan úshinshi prezident. Buǵan deiin Asqar Aqaev pen Qurmanbek Bakiev eldegi revoliýtsiia nátijesine bilikten ketken.
- Qyrǵyzstanda 4 qazanda parlament sailaýynda Jeenbekovke jaqyn úsh partiia jáne bir oppozitsiialyq partiia Jogorký keńeshke ótken. Osydan keiin 5 qazanda jurt "bilikke jaqyn partiialar jurttyń daýysyn satyp aldy, ákimshilik resýrstardy paidalandy" dep, nátijemen kelispei narazylyqqa shyqty.
- 6 qazanǵa aýǵan túni narazylar parlament pen prezident otyratyn "Aq úidi", Memlekettik ulttyq qaýipsizdik komitetiniń ǵimaratyn basyp alǵan. Narazylyqtan soń Ortalyq sailaý komissiiasy daýys berý nátijesin joiyp, qaita sailaý ótkizetinin málimdedi.
