Kásipqoi boksta jeńilip kórmegen qazaqstandyq Sadriddin Ahmedov (9-0, 8KO) kelesi kezdesýin 25 qazanda Kanadanyń Kvebek qalasynda ótkizetin boldy, dep habarlaidy "Ult aqparat".
«Qazaqstan kásipqoi boksy» VKontakte paraqshasynan habarlanǵandai, jastar arasyndaǵy WBC nusqasy boiynsha álem chempiony jáne birinshi jartylai salmaqta Aziianyń WBC chempiony, 21 jastaǵy Sadriddin Ahmedov «Kovboi» laqap atymen tanymal 31 jastaǵy meksikalyq Djonni Navarretemen (33-15-2, 15KO) kezdesedi.
«Navarrete aiqastarynyń kóbin óz otanynda ótkizgen. Ol kezdesken qarsylastardyń ishinde birinshi orta salmaqtaǵy WBO álem chempiony Haime Mýngie (34-0, 27KO) men Saýl Alvarestiń baýyry Ramon Alvaresti (28-8-3, 16KO) atap ótýge bolady. Meksikalyq atalǵan qarsylastarymen eki ret kezdesip, kóbinde jeńilgen. Bir ret Ramon Alvarespen teń túsken», - delingen habarlamada.
Sadriddin Ahmedovtyń aldaǵy aiqasy 10 raýndqa eseptelgen.
Eske sala ketsek, osy jyldyń maýsymynda Sadriddin Ahmedov kásibi mansabynda toǵyzynshy jekpe-jegin ótkizip, meksikalyq Daniel Vega Kotany (14-3-1, 11 KO) tehnikalyq nokaýtpen 90 sekýndta jeńgen bolatyn.
