QR Prezidenttigine úmitker Sádibek Túgel sailaýaldy baǵdarlamasyn tanystyrýdy elordanyń kireberisindegi Qulager eskertkishiniń janynda jinalǵan Nur-Sultan qalasy men Shortandy aýdanynyń qurmetti aqsaqaldarymen kezdesýden bastady.
«Biyl «Qulager» poemasynyń avtory Iliias Jansúgirovtyń týǵanyna 125 jyl tolatyn bolsa, osy eskertkishtiń ideiasynyń avtory ári ony ornatqan ultjandy azamat Sádibek Túgeldiń de aqsaqaldardyń batasyn alýǵa osynda kelýi jinalǵandardyń kóńilinen shyqty» delingen habarlamada.
Sádibek Túgel aqsaqaldarmen kezdesýinde óziniń sailaýaldy baǵdarlamasyndaǵy negizgi mindetterge toqtalǵan. Jastardy ulttyq qundylyqtardy ulyqtaý men otansúigishtikke tárbieleý, memlekettik tildi damytý jáne halqymyzdyń mádenieti men salt-dástúrin nasihattaý turǵysyndaǵy ustanymdaryn jetkizgen.
QR Prezidentigine úmitkerdiń atyna eńbek ardagerleri Kameliash Shoshai, Shaizanhan Qumariia jáne Aryqqara Qapi, memleket jáne qoǵam qairatkeri Qydyrbai Nurpeiisov, Qazaqstanǵa eńbegi sińgen dáriger Aldabergen Omarbekov jyly lebizderin bildirip, aq batalaryn berdi.
«Qulager eskertkishi – bul eldik pen birliktiń belgisi desek, Sádibek Túgelge jinalǵan jandar tarapynan aitylǵan aqjarma bata «Tórteý túgel bolsa, tóbedegi keledi» degendei kóńilge shýaq syilady» deidi baspasóz ókilderi.
Kezdesýge «Uly dala qyrandary» qoǵamdyq birlestiginiń teń tóraǵasy, shtab jetekshisi Marat Nábiev qatysty.
