Foto:azh.kz
Ishki ister ministri Erjan Sádenov burynǵy bas kólik prokýrory Maqsat Dúisenovke izdeý jariialanǵanyn rastady.
Májilis kýlýarynda jýrnalister ministrden Dúisenov halyqaralyq izdeýde ekeni ras pa jáne qai is boiynsha ekenin surady.
"Izdeýdiń bastamashysy biz emespiz. Sizderge quzyrly organdarǵa júginý kerek. Iá, izdeý jariialanǵan, izdeý tiziminde bar. Biz bastamashymen birlesip bul máseleni sheshemiz", – dep jaýap berdi Erjan Sádenov.
Burynǵy prokýrorǵa qatysty is qai bap boiynsha tergelip jatqany ministr tarapynan naqtylanbady.
Eske salaiyq, jýyrda Bas prokýratýranyń quqyqtyq statistika jáne arnaiy esepke alý organdary portalynda Maqsat Dúisenovtiń izdeýde ekeni týraly aqparat paida boldy. Izdestirý isi Almaty qalasy Almaly aýdany politsiia basqarmasymen prokýratýra bastamasy boiynsha 29 tamyzda tirkelgen.
