Foto: Kazakhcinema.kz
QR Mádeniet jáne aqparat ministrliginiń jáne Ulttyq kinony qoldaý memlekettik ortalyǵynyń qoldaýymen túsirilgen «Sabyr» qysqametrajdy filmi halyqaralyq deńgeide joǵary baǵalanyp, Cineshort qysqametrajdy filmder platformasynda reiting kóshbasshylarynyń qataryna endi. Film 9,3 upai jinap, kórermenderdiń erekshe yqylasyna bólendi, dep habarlaidy Ult.kz.
Týyndyda ekinshi synyp oqýshysy Sabyrjannyń shynaiy taǵdyry sýretteledi. Oqyp-jaza almaityn balaǵa anasy men muǵalimderi túsinistik tanyta almai, jii jazǵyrady. Alaida Sabyrjanda disleksiia derti bar ekeni keiin belgili bolady. Bul – balalardyń erekshe qabyldaýyn qajet etetin, qoǵamda keńinen túsinilýge tiisti jaǵdai. Film osy áleýmettik máselege nazar aýdaryp, mektep jasyndaǵy balalardyń psihologiialyq qiyndyqtaryna beijai qaramaýǵa úndeidi.
Filmniń rejisserleri — Marina Zibert pen Damir Tanatov. «Sabyr» týyndysy VIII halyqaralyq BAIQONYR kinofestivaliniń ulttyq baiqaýynda «Úzdik film» atalymyn jeńip aldy. Sondai-aq basty róldi somdaǵan Salih Beisenbai óziniń áserli oiyny úshin arnaiy marapatqa ie boldy.
Budan bólek, film UMUT halyqaralyq kinoforýmynda «Úzdik rejisser» syilyǵyna ie bolyp, Torontoda ótken Peaks Central Asian Film Festival aiasynda Soltústik Amerikadaǵy tusaýkeserin ótkizdi.
Cineshort – álemniń ár túkpirinen avtorlyq jáne festivaldik kinotýyndylardy jinaqtaityn bedeldi platforma. Onda úzdik shyǵýǵa «Sabyr» filmi laiyqty ekenin dáleldedi.
