Foto: ashyq derekkóz
Stendap-komik Nurlan Sabýrov 50 jyl Reseige kirýge tyiymǵa qatysty alǵash ret pikir bildirdi. Ol bul týraly Instagram jelisi paraqshasyndaǵy storisterinde jazdy, dep habarlaidy Ult.kz.
Sabýrov bul ispen qazir zańgerler ainalysyp jatqanyn jetkizdi.
«Bul máselemen zańgerler óz deńgeiinde quzyrly organdarmen ainalysyp jatyr. Ýaqyt bárin óz ornyna qoiady», – dep jazdy ol.
Osydan keiin ázilkesh oǵan úlken aýditoriia bergen Resei Federatsiiasyna alǵys bildirdi.
«Meniń stendap-komik retindegi jolym 15 jyl buryn Ekaterinbýrgte bastalyp, keiin Máskeýde jalǵasty. Osy jyldar ishinde Reseidiń kóptegen qalasynda boldym, keibirine birneshe ret bardym. Barlyq jerde meni jyly ári dostyq peiilmen qarsy aldy. Maǵan shyǵarmashylyq turǵyda damýǵa múmkindik bergen, ártis retinde qalyptastyrǵan elge alǵysym sheksiz. Reseide de, onyń syrtynda da kópultty úlken aýditoriia jinadym. Raqmet», – dep jazdy Sabýrov.
Sondai-aq ol jýrnalisterge, blogerlerge jáne buqaralyq aqparat quraldaryna otbasyna qatysty jeke ómirge qurmetpen qaraýdy ótindi.
Aita keteiik, buǵan deiin Nurlan Sabýrovqa Resei Federatsiiasyna 50 jylǵa, iaǵni 2076 jylǵa deiin kirýge tyiym salynǵany habarlandy. RIA Novosti málimetinshe, bul sheshim «ulttyq qaýipsizdik múddesine» bailanysty qabyldanǵan.
Reseilik BAQ dereginshe, ázilkesh Dýbaidan Máskeýdiń Vnýkovo áýejaiyna ushyp kelgen sátinde shekaradan óte almai, elge kirýge tyiym salynǵany týraly resmi qujat alǵan. Tyiym salýǵa onyń buǵan deiingi kóshi-qon talaptaryn buzýy men qarjylyq operatsiialaryna qatysty kúdikter sebep bolýy múmkin ekeni aitylýda.
Qazirgi ýaqytta Sabýrovtyń Resei aýmaǵyndaǵy múlkiniń taǵdyry belgisiz.
