"Biryńǵai ulttyq qozǵalys" partiiasynyń músheleri Mihail Saakashvilidiń bostandyǵyn talap etken mitingide. Tbilisi, 14 qazan 2021 jyl.
Grýziianyń burynǵy prezidenti Mihail Saakashvilidiń myńdaǵan jaqtasy Tbilisidegi parlament ǵimaraty mańynda miting ótkizdi. Olar saiasatkerdi bosatýdy, tym bolmaǵanda ony túrme aýrýhanasynan azamattyq emhanaǵa aýystyrýdy talap etti, dep habarlaidy Azattyq.
Aktsiiaǵa qatysýshylar "Misha! Misha!" dep urandady. Demonstranttardyń qolynda #FreeSaakashvili degen jazýy bar plakat boldy. "Eho Kavkaza" saitynyń habarlaýynsha, politsiia parlament janyndaǵy Rýstaveli dańǵylyn japqan.
Dárigerler men advokattardyń aitýynsha, Saakashvilidiń ashtyq ustap jatqanyna 44 kún bolǵan jáne jaǵdaiy múshkil. Olar Saakashvilige tek táýelsiz dárigerler ǵana kómektese alatynyn aitady, sebebi túrme aýrýhanasynyń oǵan shamasy jetpeidi.
Al Grýzin biligi eks-prezidentke qajetti kómektiń bárin kórsetip jatqanyn aitady.
Mihail Saakashvilidiń ózi 11 qarashada Eýropanyń Adam quqyǵy jónindegi sotyna qulaq túrip, ashtyqty toqtatýǵa nieti baryn aitqan. Biraq ol áýeli ózin emdeitin kópsalaly klinikaǵa aýystyrýdy talap etken.
Mihail Saakashvili qyrkúiektiń sońynda – jergilikti atqarý organyn sailaý qarsańynda eline oralǵan. Ol azamattardy sailaýǵa barýǵa úndep, sailaýdyń ertesinde Tbilisi ortalyǵyna jinalýǵa shaqyrǵan. Alaida saiasatker 1 qazanda qamaýǵa alynyp, ashtyq jariialady.
8 qarashada Mihail Saakashvilidi Rýstavi túrmesinen Tbilisidiń Gldani aýdanyndaǵy túrme aýrýhanasyna aýystyrdy. Ertesinde oppozitsionerdiń jaqtastary men azamattyq belsendiler miting ótkizip, Saakashvilidi jeke klinikaǵa aýystyrýdy talap etken.
10 qarashada Tbilisi qalalyq sotynda 2007 jylǵy oppozitsiia mitingisin taratý jáne "Imedi" telekompaniiasyndaǵy búlikke bailanysty sot bastalǵan. Alaida qylmystyq atqarý qyzmeti Saakashvilidi densaýlyǵyna bailanysty sotqa jetkizýden bas tartqan.
