Foto: QTF
Qazaqstan tennisshisi Elena Rybakina Australian Open-2023 jarysynyń finalyna shyqty. Ol jartylai finalda Viktoriia Azarenkony (Belarýs) jeńdi. Osylaisha Rybakina bul jarystyń finalyna shyqqan alǵashqy qazaqstandyq tennisshi atandy, dep habarlaidy Azattyq radiosy.
MATCh QALAI ÓTTI?
Birinshi set óte tartysty ótti. Eki tennisshi de eki retten breik-point jasady. Settiń aiaǵynda Rybakinanyń birinshi dop asyrǵany (first serve) ótpei, kóp qatelesti. Azarenko da Rybakinadan soqqylar alyp, set 6:6 boldy. Keiin set taibreikke ulasyp, taibreikte Rybakina 7:4 esebimen jeńdi.
Ekinshi set Rybakina úshin ońai boldy. Úsh ret breik-point jasap, 6:3 esebimen basym tústi. Match kezinde Rybakina 9 eis asyrdy. Osylaisha ol osy týrnirde 44 eis jasap, bul kórsetkish boiynsha lider bolyp tur.
Matchtan keiin Rybakina jeńiske jetkenine qýanyshty ekenin aityp, bapkerlerine alǵys bildirdi.
"Árine, komandam qatty qobaljyp otyrdy, olar meniń jaqsy oinaǵanymdy qalaidy ǵoi. Búgingi oiyn qiyn boldy, sebebi kún salqyn, dop durys ushpady. Agressiialy oiyn kórsete almadym. Degenmen match sońynda jaqsy oinap, jeńiske jetkenime qýanyshtymyn. Finalda da barymdy salamyn" dedi Rybakina matchtan keiin.
AP Images
Osy matchty korttan tamashalaǵan qazaqstandyq jankúier Erik Iliiasov Melbýrnde aýa raiy salqyndaý ári jel bolyp turǵanyn, bul eki tennisshiniń oiynyna keri áser etkenin aitady.
– Melbýrnde búgin +20 gradýs ári jel. Osyǵan deiin kún ystyq bolǵan. Ystyqta dop jeńil ushady. Al jeldi kúni durys ushpai qalady. Sondyqtan bolar, Elena dop asyrǵanda doby durys ushpai jatty. Jel eki oiynshyǵa da áser etti. Sheshýshi faktor senimdilik pen psihologiia boldy. Rybakina birinshi sette jeńilip qalar edi, jinaqtalyp, taibreikti óz paidasyna sheshti. Al ekinshi sette Rybakina jinaqy oinady, Azarenkonyń psihologiiasy álsiz boldy, – dedi Iliiasov .
Grand Slam jarystarynyń jeti dúrkin jeńimpazy, shvetsiialyq ardager tennisshi Mats Vilander Eurosport telearnasynyń efirinde "Bul oiynymen Rybakina aldaǵy bes jylda Grand Slam jarystarynyń on finalyna shyǵady" dep boljady.
Sarapshylar osyǵan deiin Rybakinanyń dop asyrýy óte myqty dep, onyń asyrǵan doptaryn toqtatý ia alý óte qiyn ekenin birneshe ret atap ótken.
Wimbledon jarysynyń 1987 jylǵy jeńimpazy, ulybritaniialyq Pet Kesh VVS radiosynyń efirinde "Rybakinanyń oiyny óte myqty, onymen oinaý óte qiyn. Júikeń syr bere bastaǵanda sol sátti ózińe qarsy qoldanyp ketedi" dedi.
Elena Australian Open-2023 jarysynyń finalyna shyǵardan buryn amerikalyq Daniela Kollinsti (byltyrǵy finalist), álemniń birinshi raketkasy, polshalyq Iga Shventekti, 2017 jyly Frantsiiadaǵy Roland Garros jarysyn jeńgen latviialyq Elena Ostapenkony jeńdi.
Otandasymyz senbidegi finalda Arina Sobolenko (Belarýs) pen Magda Linett (Polsha) arasyndaǵy matchtyń jeńimpazymen oinaidy.
RYBAKINA ÁLEMNIŃ ÚZDIK ON TENNISShISINIŃ QATARYNA ENBEK
Osy jeńisiniń arqasynda 23 jastaǵy Rybakina kelesi aptada áielder arasyndaǵy WTA (Áielder tennisi halyqaralyq qaýymdastyǵy) reitinginde TOP-10 tennisshiniń qataryna enbek. Buryn-sońdy Qazaqstan tennisshileri jekelei synda álemdik reitingide úzdik ondyqqa enbegen edi. Australian Open jarysy bastalǵanda Rybakina 25-orynda turǵan. Qazaqstandyq tennisshi byltyr Wimbledon (Ulybritaniia ashyq chempionaty) jarysynda jeńiske jetken soń úzdik ondyqqa enýi kerek edi. Biraq WTA Ulybritaniia úkimeti jarysqa Resei men Belarýs tennisshilerin qatystyrmaǵan soń, reitingige upai berýden bas tartqan.
33 jastaǵy Azarenko qazir reitinginiń 24-ornynda. Belarýs tennisshisi 2012- 2013 jyldary osy Australian Open jarysynda jeńiske jetken edi.
Rybakina byltyr jazda Londondaǵy Wimbledon jarysynda jeńiske jetkennen keiin jankúierler arasynda tanyla bastaǵan. Sol kezde Rybakinanyń "Grand Slam jarysynda jeńgen alǵashqy qazaqstandyq tennisshi" ekeni de, onyń Resei azamattyǵynan bas tartyp, Qazaqstan atynan jarysqa qatysa bastaǵany aitylǵan. Resei jýrnalisteri men tennis sheneýnikteri Rybakinany "bizdiń ónim" degeni Qazaqstanda qarsylyqqa ushyraǵan. Tennisshiniń ózi "Qazaqstan bolmasa, men qazir bul jeńiske jete almas edim" degen. Reseide týǵan Rybakina Qazaqstan tennis federatsiiasynyń prezidenti, millioner Bolat Ótemuratovtyń shaqyrýymen Qazaqstanǵa kelgen edi.
video: Azattyq radiosy
Rýslan Medelbek
