- Úkimettiń búgingi otyrysynda sóz alǵan «Qazaq xandyǵy. Almas qylysh» filminiń rejisseri Rústem Ábdirash atalǵan kinotýyndyny túsirý kezindegi qiynshylyqtar týraly aityp berdi, dep xabarlaidy Ult.kz tilshisi QazAqparat agenttigine silteme jasap.
«Tarixi filmderdi túsirgende qarý-jaraq jetispei jatady, oq jetispei jatady. Sonyń bári ainalyp kelgende qarajatqa tireledi. Biraq el aǵalarynyń arqasynda osy filmdi bitirip, uialmaityndai etip jasap shyqtyq dep oilaimyn. Reti kelgesin aityp qoiaiyn, sol kezdegi Qorǵanys ministri Imanǵali Nurǵaliulyna myń da bir raqmet. Osy jobaǵa kóp kómegin tigizdi. Qapshaǵaida túsirý tobynyń jatatyn ornyn berip, «egerskii polk» jiberdi, at jaǵynan úlken kómek boldy. Sondai-aq Almaty ákimi Baýyrjan Baibek te ózi kelip, kásipkerlerdi taýyp, filmniń aiaǵyna deiin túsirilýine qolǵabys jasady. Sóitip, el aǵalary arqasynda osy úlken jobany aiaqtap shyqtyq», - dedi Ábdirash.
Onyń aitýynsha, búginde xalyq tarapynan «Qazaq xandyǵy. Almas qylysh» filmine oń baǵa berip jatqandar kóp. Alaida syn aitatyndar da bar.
«Endi, syn aitpasa, bizdiń qazaq qazaq bola ma? Kezinde «Qyz Jibek» shyqqanda da biraz syn aityldy. Biraq báribir ol óz ornyn tapty. Bizdiń jobamyz da óz ornyn tabady degen oidaimyz. Búginde elden suraý túsip jatyr. Biyl filmniń jalǵasyn túsiretin oiymyz bar. Sondyqtan sizder, el aǵalary qoldap, osy joly durys biýdjet berińizdershi. Óitkeni qinalyp jumys isteisiń. Aiaǵyńa tartsań, basqa jetpeidi. Basyńa tartsań, aiaqqa jetpeidi. Endi, bul ózimniń ákem týraly film emes. Ol - búkil xalqymyzdyń tarixy. Osy jerde otyrǵan barlyq azamattardyń tarixy. Sondyqtan bul jobany jalǵastyryp, kelesi jyly pash etsek, durys bolar edi», - dep atap kórsetti rejisser.
Barlyq quqyqtar qorǵalǵan. inform.kz belsendi siltemeni paidalanyńyz http://www.inform.kz/kz/kazak-syn-aytpasa-kazak-bola-ma-almas-kylysh-fil-minin-rezhisseri_a2989874
