Jýrnalist Rýslan Ótepbai jazyqsyz jala jabylǵan malshynyń isin zerttemek, dep habarlaidy ult.kz.
Ol bul týraly áleýmettik jelidegi paraqshasynda aitty.
«Sanaly ǵumyryn mal baǵýǵa arnaǵan Rahat Sársenovtiń isi boiynsha Aqtóbege attandym. 33 jyl boiy jylqy baqqan 60 jastaǵy azamat 100 jylqy urlady degen aiyppen 7 jylǵa sottalǵan. Alaida apelliatsiialyq sot isti qaita qarap, ony sot zalynan bosatty. Bul iste jaýapsyz suraq óte kóp.
- 100 jylqy týraly aiyp qalai taǵyldy?
- Alǵashqy sot qandai dálelderge súienip Rahat Sársenovti 7 jylǵa bas bostandyǵynan aiyrdy?
- Zań talaptary tolyq saqtaldy ma?
- Apelliatsiialyq sottyń úkimi kúshine endi me? “, - dep jazdy jýrnalist.
Aita keteiik, Aqtóbe oblystyq soty 60 jastaǵy jylqyshy Rahat Sársenovke qatysty shyǵarylǵan úkimdi qaita qarap, ony sot zalynan bosatty.
Buǵan deiin ol qojalyq iesiniń aryzynan keiin 100 jylqyny jymqyrdy degen aiyppen 7 jylǵa bas bostandyǵynan aiyrylyp, moinyna shamamen 30 million teńge shyǵyn ilingen bolatyn. Alaida apelliatsiialyq sotta usynylǵan qosymsha dálelder nátijesinde bir ǵana jylqynyń joǵalǵany anyqtaldy.
Apelliatsiialyq sot otyrysy emotsiiaǵa toly ótti. Ómiriniń 33 jylyn jylqy baǵýǵa arnaǵan Rahat Sársenov úkim ózgergennen keiin sot zalynan bostandyqqa shyqty. Densaýlyǵy syr bergen azamat sot barysynda sóilei almai, kóz jasyna erik berdi. Onyń insýltten keiin bir qoly men bir aiaǵy tolyq jumys istemei qalǵan, sóileýi de qiyndaǵan.
