Shpagamen semserlesýden Qazaqstan quramasynyń ókili Rýslan Qurbanov Tokio Olimpiadasyna joldama aldy, dep habarlaidy Olympic.kz saity.
Halyqaralyq semserlesý federatsiiasy (FIE) bekitken Olimpiadaǵa irikteý erejesi boiynsha, árbir qarý túrinen 8 komanda joldamaǵa iligedi. Onyń ishinde FIE reitinginde joǵary ornalasqan 4 komanda litsenziia alady, al 5-16-ynshy oryndaǵy komandalar ishinen óz qurlyqtarynda (Eýropa, Amerika, Afrika, Aziia/Okeaniia) úzdik atanǵandar Olimpiadaǵa attanady.
Jekelei synda komandalyq týrnir arqyly joldama alǵan komandalardan 24 sportshy baq synaidy. Komandalyq týrnirde synǵa túspeitin atletter arasynan FIE reitingindegi úzdik 6 sportshy litsenziia iegeri atanady. Bul joldamalar sportshylardyń geografiialyq aimaǵy arqyly bólinedi. Iaǵni, Aziia-Okeaniia aimaǵynan eki, Eýropadan eki, Amerika men Afrikadan bir-bir sportshydan Tokio oiyndaryna litsenziia ielenedi. Qalǵan tórt joldama qurlyqtyq irikteý syndarynda taratylyp, Olimpiada oiyndarynda jalpy esebi 34 sportshy synǵa túsedi.
Halyqaralyq semserlesý federatsiiasynyń (FIE) reitingi boiynsha, Olimpiadaǵa tikelei joldama alǵan alty sportshy belgili boldy. Olar - Rýslan Qurbanov (Qazaqstan), Masara Iamada (Japoniia), Gergei Shikloshi (Vengriia), Bas Vervilen (Niderland), Gaskon Rýben Limardo (Venesýela), Mýssam Elkord (Marokko).
Osylaisha, Qazaqstan komandasynyń qorjynyndaǵy litsenziialar sany 45-ke jetti.
Osydan úsh kún buryn ústel tennisinen Anastasiia Lavrova joldamaǵa qol jetkizgen bolatyn.
Rýslan Qurbanov 1991 jyly 17 qyrkúiekte Óskemen qalasynda dúniege kelgen. Semserlesýden Aziia chempionatynyń qola júldegeri, 2013 jylǵy Ýniversiada oiyndarynyń kúmis júldegeri. Sondai-aq, álem kýbogi kezeńderinde birneshe ret júldegerler qatarynan kóringen.
