شپاگامەن سەمسەرلەسۋدەن قازاقستان قۇراماسىنىڭ ٶكٸلٸ رۋسلان قۇربانوۆ توكيو وليمپياداسىنا جولداما الدى, دەپ حابارلايدى Olympic.kz سايتى.
حالىقارالىق سەمسەرلەسۋ فەدەراتسيياسى (FIE) بەكٸتكەن وليمپياداعا ٸرٸكتەۋ ەرەجەسٸ بويىنشا, ەربٸر قارۋ تٷرٸنەن 8 كوماندا جولداماعا ٸلٸگەدٸ. ونىڭ ٸشٸندە FIE رەيتينگٸندە جوعارى ورنالاسقان 4 كوماندا ليتسەنزييا الادى, ال 5-16-ىنشى ورىنداعى كوماندالار ٸشٸنەن ٶز قۇرلىقتارىندا (ەۋروپا, امەريكا, افريكا, ازييا/وكەانييا) ٷزدٸك اتانعاندار وليمپياداعا اتتانادى.
جەكەلەي سىندا كوماندالىق تۋرنير ارقىلى جولداما العان كوماندالاردان 24 سپورتشى باق سىنايدى. كوماندالىق تۋرنيردە سىنعا تٷسپەيتٸن اتلەتتەر اراسىنان FIE رەيتينگٸندەگٸ ٷزدٸك 6 سپورتشى ليتسەنزييا يەگەرٸ اتانادى. بۇل جولدامالار سپورتشىلاردىڭ گەوگرافييالىق ايماعى ارقىلى بٶلٸنەدٸ. ياعني, ازييا-وكەانييا ايماعىنان ەكٸ, ەۋروپادان ەكٸ, امەريكا مەن افريكادان بٸر-بٸر سپورتشىدان توكيو ويىندارىنا ليتسەنزييا يەلەنەدٸ. قالعان تٶرت جولداما قۇرلىقتىق ٸرٸكتەۋ سىندارىندا تاراتىلىپ, وليمپيادا ويىندارىندا جالپى ەسەبٸ 34 سپورتشى سىنعا تٷسەدٸ.
حالىقارالىق سەمسەرلەسۋ فەدەراتسيياسىنىڭ (FIE) رەيتينگٸ بويىنشا, وليمپياداعا تٸكەلەي جولداما العان التى سپورتشى بەلگٸلٸ بولدى. ولار - رۋسلان قۇربانوۆ (قازاقستان), ماسارا يامادا (جاپونييا), گەرگەي شيكلوشي (ۆەنگرييا), باس ۆەرۆيلەن (نيدەرلاند), گاسكون رۋبەن ليماردو (ۆەنەسۋەلا), مۋسسام ەلكورد (ماروككو).
وسىلايشا, قازاقستان كومانداسىنىڭ قورجىنىنداعى ليتسەنزييالار سانى 45-كە جەتتٸ.
وسىدان ٷش كٷن بۇرىن ٷستەل تەننيسٸنەن اناستاسييا لاۆروۆا جولداماعا قول جەتكٸزگەن بولاتىن.
رۋسلان قۇربانوۆ 1991 جىلى 17 قىركٷيەكتە ٶسكەمەن قالاسىندا دٷنيەگە كەلگەن. سەمسەرلەسۋدەن ازييا چەمپيوناتىنىڭ قولا جٷلدەگەرٸ, 2013 جىلعى ۋنيۆەرسيادا ويىندارىنىڭ كٷمٸس جٷلدەگەرٸ. سونداي-اق, ەلەم كۋبوگٸ كەزەڭدەرٸندە بٸرنەشە رەت جٷلدەگەرلەر قاتارىنان كٶرٸنگەن.
