Foto: ashyq derekkózden
Jańa Memlekettik Eltańba naqty qandai bolýy kerek degen máselede ortaq kózqaras joq, deidi QR Memlekettik rámizderdi nasihattaý jónindegi ulttyq ortalyǵynyń atqarýshy direktory Rýslan Hamza.
Jýyrda ǵana «Jańa adamdar» qozǵalysy qazaqstandyqtar Memlekettik Eltańbany qanshalyqty biletini jóninde saýalnama júrgizgen bolatyn. Saýalnama kórsetkendei, kóptegen azamat Qazaqstan Eltańbasyn tanymaityn bolyp shyqty.
Saýalnamaǵa qatysýshylardyń 70 paiyzy Eltańbamyzdyń beinesindegi jekelegen elementteriniń máni men maǵynasyn túsinbeitinin aitty. Tek 30 paiyz qatysýshy alty birdei uqsas rámizder arasynan bizdiń tól Eltańbamyzdy naqtylap, tanyp kórsete aldy. Al kóbisi uqsas rámizder arasynan qanatty tulpary bar ózimizdiń eltańbamyzdy emes, qustar men aidahar beinelengen ózge rámizderdi kórsetken.
Qazirgi QR Memlekettik Eltańbaǵa 32 jyl toldy. Ol 1992 jyly qabyldanǵan edi. Avtorlary – belgili sáýletshiler Jandarbek Málibekov pen Shot-Aman Ýálihan. Onyń ortalyq geraldikalyq elementi – kógildir tús aiasyndaǵy shańyraq (kiiz úidiń joǵarǵy kúmbez tárizdi bóligi) beinesi. Shańyraqty ainala kún sáýlesi sekildi taraǵan ýyqtar shanshylǵan. Shańyraqtyń oń jaǵy men sol jaǵyna ańyzdardaǵy qanatty pyraqtar beinesi ornalastyrylǵan. Joǵarǵy bóliginde – kólemdi bes buryshty juldyz, al tómengi bóliginde «Qazaqstan» degen jazý bar. Juldyzdyń, shańyraqtyń, ýyqtardyń, ańyzdardaǵy qanatty pyraqtardyń beinesi, sondai-aq «Qazaqstan» degen jazý – altyn tústes.
Búgingi ýaqytta, joǵarda júrgizilgen saýalnamanyń qorytyndysyna kelip, ulttyq ortalyǵy jergilikti ákimshiliktermen birlesip, QR Memlekettik rámizderdi nasihattaý jáne olardy qoldaný boiynsha ádistemelik seminarlar ótkizýdi josparlap otyr.
"Jańa Memlekettik Eltańba naqty qandai bolýy kerek degen máselede ortaq kózqaras joq. Degenmen, el ishinde bul másele áli qoǵam talqysyna salynyp, talqylanatyny haq", - deidi Rýslan Hamza.
